Ўзбекистон Ички ишлар вазирлиги маълумотларига кўра, сўнгги икки йил давомида мамлакатдаги тергов жараёнлари чоғида гумонланувчилар орасида ўлим ҳолатлари аниқланмаган. Бу ҳақда вазир ўринбосари Рамазон Ашрапов журналистлар билан мулоқотда маълум қилди.
Унинг сўзларига кўра, 2024–2025 йилларда тергов жараёнида бундай ҳолатлар қайд этилмаган. Сўнгги воқеа 2023 йилда Юқоричирчиқ туманида содир бўлган. Ўшанда Қозоғистон фуқароси сўроқ пайтида юрак хуружидан вафот этган.
“Бу ҳолат видеокузатув камераларига ёзиб олинган, экспертиза ва гувоҳлар кўрсатмалари ички ишлар ходимлари томонидан ноқонуний ҳаракатлар йўқлигини тасдиқлади. Шунингдек, прокуратура ҳам жиноят таркиби аниқланмаганини қайд этди”, — деди Ашрапов.
Унинг таъкидлашича, ҳозирда мамлакатдаги барча сўроқ хоналари видеокузатув тизими билан жиҳозланган. Тартиб ИИВнинг 101-сонли буйруғи билан қатъий белгилаб қўйилган — тергов жараёнлари фақат махсус хоналарда ўтказилиши мумкин.
“Бу чоралар фуқароларни ҳам, ходимларни ҳам асоссиз айбловлардан ҳимоя қилади. Менинг фаолиятим давомида ички ишлар тизимида ҳам, тергов департаментларида ҳам ўлим ҳолатлари кузатилмади”, — деди вазир ўринбосари.
«Замин»ни Telegram’да ўқинг!
