Ўзбекистон Республикасининг Миграция агентлиги хорижда яшаётган ўзбекистонликларга мурожаат қилиб, ташқи давлатларда қуролли тўқнашувларга аралашишнинг жиноят жавобгарлигини эслатди, деб ёзмоқда Nova24 нашри.
Агентликнинг хабарига кўра, айрим давлатларда мигрантларни жанговар ҳаракатларга жалб қилиш ҳолатлари кўпайган. Бу эса фуқаронинг ҳаёти, эркинлиги ва келажагига жиддий хавф солади. Шунингдек, агентлик ўзбекистонликларга қуйидаги қатъий тақиқларга риоя қилишни маслаҳат берди:
- Қуролли тўқнашувлар ва жанговар ҳаракатлар ҳудудларига яқинлашмаслик;
- Ҳарбий операцияларда иштирок этмаслик;
- Ташқи давлатларнинг қуролли кучларига, хавфсизлик хизматларига, ҳарбий адлия ёки бошқа куч структураларига қўшилмаслик;
- Шубҳали шахслар, гуруҳлар ёки ташкилотларнинг ёллаш таклифларига рози бўлмаслик.
Шунингдек, Ўзбекистон Жиноят кодексининг 154-1-моддасига кўра, Ўзбекистон фуқаросининг ташқи давлатнинг ҳарбий хизматига, хавфсизлик органлари ёки полиция хизматларига кириши, шунингдек, ёллаш таклифларини қабул қилиш жаримага тортилиши ёки уч йилгача тузатиш ишлари билан жазоланади. Ёллаш ҳолатларида эса, ўзбекистонликларга уч йилдан беш йилгача озодликдан маҳрум этиш ёки эркинликни чеклаш жазоси берилиши мумкин.
Бундан ташқари, шубҳали таклифлар ёки вазиятларда, ўзбекистонликларга Миграция агентлиги, Ўзбекистоннинг дипломатик ваколатхоналари ёки консулликларига тезда мурожаат қилиш тавсия қилинди.
«Замин»ни Telegram’да ўқинг!
