Навоий шаҳридаги Tinchlik Plaza меҳмонхонасида рўй берган нохуш ҳолат бутун жамоатчилик эътиборини тортди. Ёш йигит — меҳмонхона эшик оғаси, мижозлар билан боғлиқ тортишув ортидан калтакланди. Ҳолат ҳақида ижтимоий тармоқларда тарқалган видеолавҳа катта муҳокамаларга сабаб бўлди.
Маълумотларга кўра, жанжал 21 август куни ярим тунда меҳмонхона ҳовлисида, “PREZIDENT SOVG’ASI” деб ёзилган автомашина олдида содир бўлган. Айнан шу машина Паралимпиада чемпиони Элбек Султоновга тегишли бўлгани ҳам маълум қилинди. Бироқ спортчи жанжалга тўғридан-тўғри аралашмаган, калтаклашда унинг ҳамроҳи иштирок этган.
2004 йилда туғилган меҳмонхона ходими М.У.нинг айтишича, низо 150 минг сўмлик тўлов масаласи атрофида келиб чиққан. У официант сўровига кўра, мижоздан қолган ҳисобни сўраш учун ташқарига чиққан. Аммо вазият кескинлашиб, мижознинг ҳамроҳи кутилмаганда унинг юзига зарба берган. Оқибатда йигит ерга йиқилиб, оғир жароҳат олган.
М.У. қарийб 10 кун давомида шифохонада даволанди. Унинг қариндошлари қайд этишича, ўтказилган текширувлар бош мия чайқалишини кўрсатган. Урган шахс дастлаб кечирим сўрамаган, фақат видео тарқалгандан кейин ходимнинг уйига бориб, ота-онаси олдида узр сўрашга мажбур бўлган.
Навоий ИИБ ахборот хизмати маълумотича, калтаклаган шахс — 1994 йилда туғилган С.А. спиртли ичимлик таъсирида бўлган. Тергов суриштирувлари давомида у Паралимпиада чемпиони Элбек Султонов билан бирга ресторанга боргани ва жанжал пайтида спортчи машинада қолгани, кейин эса вазиятни тинчлантиришга урингани аниқланган.
Ҳозирда ҳолат юзасидан Жиноят кодексининг 277-моддаси (Безорилик) билан жиноят иши қўзғатилган. Тергов ҳаракатлари давом этмоқда.
Мутахассислар бу воқеа жамиятдаги оддий тушунмовчилик ва ҳиссиётга берилган ҳаракатлар қанчалик оғир оқибатларга олиб келиши мумкинлигини кўрсатиб турганини таъкидламоқда.
«Замин»ни Telegram’да ўқинг!
