Тошкент вилоятида йўл ҳаракати билан боғлиқ яна бир нохуш воқеа қайд этилди. Вилоят Йўл ҳаракати хавфсизлиги бошқармаси тарқатган расмий маълумотга кўра, 2 сентябрь куни эрталаб 18 ёшли йигит акасининг Malibu русумли автомобилини ҳайдовчилик гувоҳномасисиз бошқариб, ўқувчига тўқнашди.
Ҳодиса соат 09:30 атрофида Қуйи Чирчиқ тумани “Сергели” маҳалласи ички йўлида содир бўлган. Маълумотларга кўра, мактабда ўқимайдиган, 2007 йилда туғилган йигит транспорт воситасини жойидан қўзғатиш пайтида йўлда кетиб бораётган 2008 йилда туғилган 11-синф ўқувчисини уриб юборган.
Ишончли манбалар қайд этишича, бахтга яраша пиёда тан жароҳати олмаган. Бироқ ҳодиса маҳаллий аҳоли орасида хавотир уйғотган ва ўсмирлар томонидан қонунга хилоф ҳолда автомобил бошқариш қанчалик хавфли оқибатларга олиб келиши мумкинлигини яна бир бор кўрсатган.
Ҳозирда Malibu автомашинаси жарима майдонига олиб кетилган. Қуйи Чирчиқ тумани ИИБ ЙҲХБ томонидан суриштирув ишлари олиб борилмоқда. Мутасаддиларнинг таъкидлашича, тергов натижаларига кўра айбдор шахснинг жавобгарлиги белгиланади.
Мутахассислар ота-оналарга мурожаат қилиб, ўсмирларнинг транспорт воситаларига ноқонуний тарзда ўтиришига йўл қўймаслик зарурлигини уқтирмоқда. Чунки бир зумлик беэътиборлик кўп ҳолларда қайғули оқибатларга олиб келиши мумкин.
«Замин»ни Telegram’да ўқинг!
