Тошкентда ҳайдовчи Н.Ю. номи билан боғлиқ ҳолат жамоатчиликда катта қизиқиш уйғотди. Унга нисбатан Мажбурий ижро бюроси Тошкент шаҳар бошқармаси томонидан жами 370 та ижро ҳужжати иш юритувга олингани маълум қилинди. Ушбу ҳужжатларнинг умумий қиймати 328,7 миллион сўмни ташкил этмоқда.
Маълумотларга кўра, қарздор фуқаронинг асосий муаммоси — йўл ҳаракати қоидаларини қайта-қайта бузиши. Аниқланишича, 2024–2025 йиллар давомида у ўзининг “JETOUR” русумли автомобилида 354 маротаба қоидабузарлик содир этган ва натижада 258,7 миллион сўмлик маъмурий жарима тўпланган. Бироқ у жарималарни тўлашга бирор марта ҳам ҳаракат қилмаган.
Бундан ташқари, ҳужжатлар орасида 14 та солиқ қарзлари бўлиб, уларнинг умумий қиймати 51,8 миллион сўмга етган. Шунингдек, “Микрокредитбанк” АТБ фойдасига 18,2 миллион сўм кредит қарзини ундириш юзасидан ҳам икки ижро ҳужжати келиб тушган.
Текширув жараёнида маълум бўлишича, ҳайдовчи фойдаланаётган “JETOUR” автомобили кредит асосида олинган ва банк гарови сифатида расмийлаштирилган. Тўловларнинг бажарилмагани туфайли бу транспорт воситасига нисбатан хатлов чораси қўлланилган.
Ҳозирда умумий миқдори 328,7 миллион сўмдан ошган қарздорликни ундириш бўйича тегишли ижро ҳаракатлари амалга оширилмоқда. Мутасаддилар бу ҳолат қоидабузарлик ва тўловларни ўз вақтида бажармаслик қандай оғир оқибатларга олиб келишини яққол кўрсатишини таъкидлашди.
«Замин»ни Telegram’да ўқинг!
