Самарқанд шаҳрида содир бўлган навбатдаги йўл-транспорт ҳодисаси жамоатчиликда катта баҳс-мунозараларга сабаб бўлди. Жорий йилнинг 3 сентябрь куни тунги соат 01:00 ларда Ибн Сино кўчаси ва аэропорт ҳудудида юқори тезликда ҳаракатланаётган Cobalt автомобили назоратни йўқотиб, олдин йўлда кетиб бораётган скутерни уриб юборди.
Вилоят Йўл ҳаракати хавфсизлиги бошқармаси маълумотларига кўра, Cobalt ҳайдовчиси меъёрдан анча юқори тезликда ҳаракат қилган. Натижада у руль бошқарувини йўқотган ва аввал скутер ҳайдовчиси ҳамда йўловчисини уриб юборган, кейин эса аэропорт кириш қисмидаги автоматик тўсиққа бориб урилган.
Ҳодиса оқибатида скутер ҳайдовчиси ва йўловчиси жароҳатлар олиб, шифохонага мурожаат қилишга мажбур бўлган. Айни пайтда уларнинг соғлиғи врачлар назорати остида экани айтилмоқда.
Ҳолат юзасидан Самарқанд шаҳри ИИО ФМБ ЖХХ ЙҲХБ томонидан дастлабки суриштирув ишлари бошланган. Текширув давомида ҳайдовчининг ҳаракатлари ва ҳодисага олиб келган сабаблар атрофлича ўрганилмоқда.
Мутахассислар таъкидлашича, бу каби фожиали ҳолатларнинг асосий сабабларидан бири — меъёрдан ортиқча тезлик ва йўлдаги масъулиятсизликдир. Улар ҳайдовчиларга қоидаларга қатъий риоя қилиш ва айниқса аэропорт каби аҳоли гавжум жойларда эҳтиёткорликни ошириш зарурлигини эслатиб ўтишмоқда.
Жамоатчилик эса бу воқеа яна бир бор йўлларда назоратни кучайтириш, тезлик чекловларига амал қилиш ва жамоат хавфсизлигини таъминлаш долзарблигини кўрсатганини қайд этмоқда.
«Замин»ни Telegram’да ўқинг!
