Андижон вилоятида 5 сентябрь куни юз берган ёнғин жамоатчилик диққатини ўзига тортди. Вилоят Фавқулодда вазиятлар бошқармаси маълумотларига кўра, ҳодиса Андижон туманида жойлашган автомобилларга газ тўлдириш шохобчасида содир бўлган.
Маълум қилинишича, MAN русумли ёқилғи ташувчи автомобил цистернасидан тахминан 5 тонна пропан суюлтирилган газни қуйиш жараёнида технологик талаблар бузилган. Шу боис ўт чиқиб, катта ҳудудда ёнғин авж олган.
Фавқулодда вазият ҳақида соат 12:05 да хабар келиб тушган. Ёнғин-қутқарув бўлинмалари 12:13 да ҳодиса жойига етиб келиб, қисқа фурсат ичида ҳаракатга тушган. Олов соат 12:26 да ўраб олинган ва 13:03 да тўлиқ бартараф этилган.
Ҳокимият ва мутасаддиларнинг қайд этишича, воқеа давомида инсонлар тан жароҳати олмаган. Бу эса ёнғин-қутқарув хизматининг ўз вақтидаги ҳаракатлари сабаб катта фожиа олди олинганини кўрсатади.
Мутахассислар бундай ҳодисалар асосан хавфсизлик қоидаларига риоя этилмагани оқибатида содир бўлишини таъкидлашмоқда. Шунинг учун ҳам жамоатчиликка ёқилғи қуйиш шохобчаларида максимал эҳтиёткорлик ва қоидаларга қатъий амал қилиш зарурлиги эслатиб ўтилди.
Шу тариқа, Андижон ҳодисаси яна бир бор хавфсизлик чоралари қай даражада муҳим эканини кўрсатиб берди.
«Замин»ни Telegram’да ўқинг!
