Тошкент шаҳрида содир бўлган жанжал ва унинг оғир оқибатлари кенг муҳокамаларга сабаб бўлди. Тунги клуб олдида чиққан можаро давомида уларни ажратишга уриниб, ўртага кирган фуқаро қаттиқ жароҳат олиб, кома ҳолатига тушган эди. У шифохонага “бош мия жароҳати, юзида йиртилган жароҳат ва спиртли ичимликдан заҳарланиш” ташхиси билан ётқизилгани ҳақида аввалроқ маълум қилинган.
Эндиликда бу воқеа бўйича айбланаётган шахс — 1995 йилда туғилган А.Ш.нинг суд жараёни бошланди. Унга Жиноят кодексининг қасддан оғир тан жароҳати етказиш, фирибгарлик ва безорилик билан боғлиқ бир нечта моддалар асосида айблов қўйилган. Мазкур иш Мирзо Улуғбек туман судида кўриб чиқилмоқда.
Олий суд матбуот котиби Азиз Обидов маълумот беришича, суд жараёни очиқ тарзда эмас, балки ёпиқ шаклда ўтказилади. Сабаб сифатида судланувчининг шахсий ва оилавий ҳаётига оид маълумотлар ошкор бўлиши мумкинлиги ва оила аъзоларининг хавфсизлигини таъминлаш зарурати кўрсатилган. Шунингдек, айбсизлик презумпцияси тамойилига амал қилиш ҳам асос қилиб олинган.
Судланувчининг адвокатлари илтимоснома киритганидан кейин раислик қилувчи судья томонидан у қаноатлантирилди ва суд жараёни ёпиқ тарзда давом эттирилиши белгиланди.
Расмий маълумотда таъкидланишича, иш натижаси бўйича адолатли ва қонуний ҳукм чиқарилиши таъминланади. Жамоатчиликда катта қизиқиш уйғотган бу иш юзасидан суд якунига етгач, оммавий ахборот воситаларига қўшимча ахборот тақдим этилиши ҳам қайд этилди.
«Замин»ни Telegram’да ўқинг!
