Наманган вилоятида юракларни титратган мудҳиш йўл-транспорт ҳодисаси рўй берди. Чортоқ ва Уйчи бекатлари орасидаги қўриқланмаган темирйўл кесишмасида поезд енгил автомашинага бориб урилди. Бу ҳақда “Ўзбекистон темир йўллари” АЖ расмий равишда маълумот тарқатди.
Маълум қилинишича, Gentra русумли автомобил ҳайдовчиси йўл ҳаракати қоидаларини қўпол равишда бузган ҳолда, яқинлашиб келаётган поезд олдидан кесиб ўтишга ҳаракат қилган. Автомобил салонида беш аёл ва бир бола бўлган. Кучли тўқнашув оқибатида машинадаги барча йўловчилар ҳалок бўлди.
Поезд ҳайдовчилари аварияни олдини олиш мақсадида шошилинч тормоз босишган, аммо юксак тезликда ҳаракатланаётган поездни тўхтатиш имкони бўлмаган. Ҳодиса натижасида поездга фақат енгилгина техник зарар етган.
Маҳаллий аҳоли ва ижтимоий тармоқ фойдаланувчилари бу қўпол қонунбузарликнинг фожиали оқибати юзасидан чуқур қайғу билан фикр билдиришмоқда. Мутахассислар эса яна бир бор йўл ҳаракати хавфсизлиги қоидаларига қатъий амал қилиш зарурлигини, айниқса, темирйўл кесишмаларидан ўтарда энг олий даражада эҳтиёткорлик талаб қилинишини уқтирмоқда.
Фожианинг тафсилотлари ўрганилмоқда. Ҳозирда тегишли идоралар томонидан терговга қадар текширув ишлари олиб борилмоқда.
«Замин»ни Telegram’да ўқинг!
