Наманган вилоятида ўтказилган махсус тезкор тадбир чоғида жамоатчиликни ташвишга соладиган ҳолат фош этилди. Давлат хавфсизлик хизмати маълум қилишича, яширин дори омборлари аниқланиб, катта миқдордаги ноқонуний препаратлар мусодара қилинди.
Маълумотларга кўра, Уйчи туманида истиқомат қилувчи 1985, 1992 ва 1993 йилда туғилган уч нафар фуқаро ўзаро тил бириктириб, контрафакт ва сифат сертификатисиз дори воситаларини ноқонуний савдога қаратган. Тергов органлари уларга тегишли бўлган Наманган шаҳри ҳамда Уйчи туманидаги бешта яширин омборни холислар иштирокида кўздан кечирди.
Текширув натижасида, Хитой, Россия, Хиндистон, Франция, Италия, Туркия, Вьетнам, Исроил, Польша, Украина, Германия каби мамлакатларда ишлаб чиқарилган, ҳужжатлари мавжуд бўлмаган 1267 турдаги препаратлар топилди. Улар умумий ҳисобда 102 минг 640 қутидан иборат бўлиб, тахминий қиймати 7,2 миллиард сўмни ташкил этади. Орасида “Гепарин”, “Актовегин”, “Хилак форте”, “Урсофальк” каби дори воситалари билан бирга, таркибида кучли таъсир этувчи моддалар бўлган “Тестостерон” ва “Ретоболил” ҳам борлиги маълум қилинди.
Тергов маълумотларига кўра, мазкур маҳсулотлар Ўзбекистонга Қирғизистон орқали айланма йўллардан олиб кирилган. Ҳозирда мазкур иш юзасидан Жиноят кодексининг 186³-моддаси ва 251¹-моддаси асосида жиноят иши қўзғатиш режалаштирилган. Терговга қадар суриштирув ишлари олиб борилмоқда.
Мутахассислар таъкидлашича, бундай ҳолатлар нафақат иқтисодий хавфсизликка, балки аҳоли саломатлигига ҳам жиддий таҳдид солади. Жамоатчилик эса бу каби ноқонуний савдоларга қарши курашда қаттиқроқ чоралар кўриш зарурлигини талаб қилмоқда.
«Замин»ни Telegram’да ўқинг!
