Навоий вилоятида содир бўлган ҳолат бутун ижтимоий тармоқларда катта муҳокамаларга сабаб бўлди. Вилоят Ички ишлар бошқармаси маълумот беришича, 15 сентябрь куни Навбаҳор туманида олиб борилган профилактика тадбирлари давомида болалар ҳаётига жиддий хавф туғдирувчи ҳолат қайд этилган.
Назоратда бўлган Damas автомобили тўхтатилганда ҳайдовчи салонда жами 23 нафар боғча тарбияланувчисини ва уларга ҳамроҳ бўлган 2 нафар тарбиячини ташиётгани аниқланди. Яна ҳам ажабланарлиси, ҳайдовчининг айтишича, салонда унинг ўз фарзанди ҳам бўлган.
Ҳолатни янада оғирлаштирган жиҳат – ҳайдовчи нафаќат маст ҳолда, балки ҳайдовчилик гувоҳномасисиз транспорт воситасини бошқарган. Бу эса нафақат қонун бузилиши, балки болалар ҳаёти учун жуда катта хавф солиши билан алоҳида эътиборга арзийди.
Ҳуқуқ-тартибот идоралари ҳайдовчига нисбатан тегишли чоралар кўрди. Damas автомобили вақтинча жарима майдончасига жойлаштирилди, ҳайдовчи эса қонун доирасида жавобгарликка тортилади.
Мутахассислар таъкидлашича, бу каби ҳолатлар йўл ҳаракати хавфсизлигига жиддий таҳдиддир. Хусусан, болаларни ташишда ҳар қандай қонунбузарликнинг оқибати фожиали тугаши мумкин. Шу боис, нафақат давлат идоралари, балки ота-оналар ҳам болаларни мактабгача муассасага олиб боришда ишончли ва хавфсиз йўлларни танлаши зарурлиги қайд этилмоқда.
Жамоатчиликнинг фикрича, бу каби қонунбузарликларга нисбатан қатъий чоралар кўрилиши ва кенг тарғибот ишлари олиб борилиши керак. Чунки болаларнинг ҳаёти ва соғлиги энг юқори қадрият бўлиб, унга бепарво қараш жамият келажагига ҳам бефарқликни англатади.
«Замин»ни Telegram’да ўқинг!
