Самарқанд шаҳрида содир бўлган йўл-транспорт ҳодисаси жамоатчилик орасида катта муҳокамаларга сабаб бўлди. Ижтимоий тармоқларда тарқалган видеода мотоцикл ва енгил автомобил иштирокидаги хавфли тўқнашув ёзиб олинган.
Маълумотларга кўра, воқеа 15 сентябрь куни соат 03:30 атрофида Уста Умар Жўрақулов кўчасида қайд этилган. BMW S1000RR русумли юқори тезликка мўлжалланган спорт мотоциклини бошқараётган ҳайдовчи светофорнинг яшил чироғида ҳаракатланиб келаётган пайтда катта шиддат билан “Оних” автомашинасига бориб урилган.
Тезликнинг юқорилиги ва соатнинг кеч бўлиши туфайли ҳайдовчи вазиятни назоратдан чиқариб қўйгани тахмин қилинмоқда. Зарба кучли бўлгани сабабли мотоциклчи турли тан жароҳатлари билан касалхонага ётқизилган. Ҳозирги пайтда у шифокорлар назорати остида.
Самарқанд вилояти Йўл ҳаракати хавфсизлиги бошқармаси маълумот беришича, мазкур ҳодиса юзасидан терговга қадар текширув ишлари бошланган. Ҳодисанинг барча ҳолатлари, жумладан, ҳайдовчиларнинг ҳаракат тезлиги ва йўлдаги вазият атрофлича ўрганилмоқда.
Мутахассислар таъкидлашича, спорт мотоцикллари катта тезликка эга бўлгани боис уларни бошқариш катта тажриба ва масъулият талаб қилади. Ҳатто кичик хатолик ҳам оғир оқибатларга олиб келиши мумкин. Шу боис йўл ҳаракатининг барча иштирокчилари эҳтиёткор бўлиши ва белгиланган қоидаларга қатъий риоя этиши зарур.
Жамоатчилик ва фуқароларга яна бир бор эслатиб ўтилади: тезликка берилган бир лаҳзали ҳавойи хурсандчилик сониялар ичида ҳаёт учун хавфли оқибатларга олиб келиши мумкин.
«Замин»ни Telegram’да ўқинг!
