Тошкент шаҳрида содир бўлган ҳодиса ижтимоий тармоқларда катта муҳокамаларга сабаб бўлди. Жамоат транспортида эркак ёш қизларга нисбатан уятсиз ҳаракатлар қилгани акс этган видео тарқалгач, пойтахт Ички ишлар бош бошқармаси расмий баёнот берди.
Маълум бўлишича, мазкур ҳолат 11 сентябрь куни соат 08:00–09:00 орасида Чилонзор туманидан Сирғалига йўналган 11-сонли автобусда содир бўлган. Йўловчи сифатида ҳаракатланаётган эркак ўзга йўловчи қизларга нисбатан шаҳвоний шилқимлик қилган, видеода акс этган шахс 1971 йилда туғилган Ф. исмли эркак бўлиб чиқди. У тез орада топилиб, Чилонзор тумани ички ишлар органларига олиб борилди. 17 сентябрь куни Чилонзор туман судида мазкур иш кўриб чиқилди.
Ҳуқуқбузар сўроқда қилган ишини тан олиб, ўзини оқламасдан, амалидан афсусланганини билдирган:
“Дружба бекати атрофида ёнимга бир қиз чиқиб қолди. Шу пайт нафсимга йўл қўйиб, ўзимни тийолмадим, қўлим орқа томонга кетиб қолди. Ўз қилмишдан шармандали ҳолга тушдим, узр сўрайман. Бундан кейин бундай ишни ҳеч қачон такрорламайман”, – деган у.
Иш ҳужжатлари тўпланиб, Чилонзор туман судига юборилган. Судда эркак Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) бўйича айбдор деб топилди. Суд қарорига кўра, унга 5 сутка маъмурий қамоқ жазоси тайинланди.
Мутахассислар таъкидлашича, жамоат транспортидаги бундай ҳолатлар нафақат қонунбузарлик, балки жамият ахлоқига ҳам жиддий путур етказади. Шунинг учун фуқаролар ўз ҳуқуқларини билиши, бундай вазиятларга гувоҳ бўлганида дарҳол ҳуқуқ-тартибот органларига мурожаат қилиши зарур.
«Замин»ни Telegram’да ўқинг!
