Фарғона шаҳрида содир бўлган нохуш ҳолат йўловчилар ва ҳайдовчилар орасида катта муҳокамаларга сабаб бўлди. Вилоят ЙҲХБ маълумотларига кўра, 18 сентябрь куни соат 12:00 ларда ҳайдовчи ўзининг “Лабо” русумли автомашинасига газ тўлдириш мақсадида махсус станцияга кирган. Бироқ эҳтиётсизлик сабаб у пропан учун мўлжалланган балонга метан газ қўйиб юборган.
Хато тўлдириш оқибатида транспорт воситасига ўрнатилган газ балони кескин портлаб, автомашина техник жиҳатдан жиддий шикастланган. Омадга кўра, ҳодиса вақтида бирон-бир фуқаро тан жароҳати олмаган.
Ҳозирги вақтда масъул идоралар ушбу воқеа юзасидан қўшимча ўрганиш ишларини олиб боришмоқда. Мутасаддиларнинг таъкидлашича, бундай ҳолатлар кўпинча ҳайдовчиларнинг газ турлари ҳақида етарли маълумотга эга эмаслиги ва хавфсизлик қоидаларига бепарво қараши оқибатида юзага келади.
Эслатиб ўтамиз, бундан аввал ҳам Сурхондарё вилоятидаги метан қуйиш шохобчасида “Нексия-2” автомашинаси портлагани ҳақида хабар берилган эди.
Мутахассислар ҳайдовчиларни газ турларини аниқ ажратиш, автомашинадаги ускуналарнинг техник ҳолатини мунтазам текшириб туриш ҳамда қуйиш пайтида эҳтиёт чораларига қатъий риоя қилишга чақирмоқда. Чунки бир лаҳзали хато нафақат мол-мулкка, балки инсон ҳаётига ҳам катта хавф туғдириши мумкин.
«Замин»ни Telegram’да ўқинг!
