Россияда содир бўлган нохуш ҳодиса юзасидан янги маълумотлар очиқланди. Аввал хабар қилинганидек, Санкт-Петербург шаҳрида Россия Федерацияси Олий суди ва Суд департаменти қурилиш майдонида бахтсиз ҳодиса оқибатида бир ўзбекистонлик йигит ҳалок бўлган эди.
Ўзбекистоннинг Санкт-Петербургдаги Бош консулхонаси расмий баёнот билан чиқиб, марҳумнинг шахси аниқланганини маълум қилди. Маълумотларга кўра, вафот этган йигит — 2001 йилда Сурхондарё вилоятида туғилган Ўзбекистон фуқароси А.У. бўлиб чиқди. У жорий йил апрель ойидан буён Петербургда меҳнат қилиб, металл конструкциялар монтажчиси сифатида ишлаб келаётгани қайд этилди.
Тафсилотларга кўра, 16 сентябрь куни монтаж ишлари жараёнида йигит 15 метр баландликдан йиқилиб тушган. Афсуски, олинган оғир жароҳатлар оқибатида у воқеа жойида вафот этган. Жасад моргга юборилган, ҳозирда терговчилар ҳодиса юзасидан текширув ишларини олиб боришмоқда ва жиноят иши қўзғатиш эҳтимоли кўриб чиқилмоқда.
Бош консулхона ҳамда Москвадаги Миграция агентлиги ваколатхонаси ҳозирда марҳумнинг оила аъзолари билан доимий алоқада бўлиб турибди. Улар жасадни ватанга қайтариш жараёнида зарур барча ташкилий ва ҳуқуқий ёрдамни кўрсатишини маълум қилишди.
Мутахассислар таъкидлашича, хорижда меҳнат қилаётган юртдошларимизнинг хавфсизлиги масаласи жуда муҳим. Шу боис меҳнат муҳожирлари хавфсизлик қоидаларига риоя қилиши ва иш берувчи ташкилотлар томонидан иш шароитлари доимий назоратда бўлиши зарурлиги алоҳида қайд этилмоқда.
«Замин»ни Telegram’да ўқинг!
