Навоий вилоятида ҳайдовчи вақтни тежаш мақсадида йўлни ўзгартириб, кутилмаган ҳолатга дуч келди. «Навоий–Зарафшон» йўлида ҳаракатланаётган «Жентра» русумли автомобил қум ичига ботиб қолди.
Маълумотларга кўра, ҳайдовчи манзилга тезроқ етиб бориш учун асосий йўлдан оғган ва қумли ҳудуддан ўтишга уринган. Аммо у ерда автомобиль ғилдираклари қумга ботиб қолиб, ҳаракатлана олмай қолган.
Ҳодиса юзасидан Навоий вилояти Фавқулодда вазиятлар бошқармасига «112» ягона рақами орқали хабар берилган. Чақирув асосида қутқарувчилар тезда воқеа жойига етиб бориб, автомобилни қумдан чиқариш ишларини амалга оширишган.
Фуқаро ҳаёти ва соғлигига зарар етмагани айтилмоқда. Мутасаддилар таъкидлашича, шошма-шошарлик билан йўлни қисқартириш ҳаракатлари кўп ҳолларда ана шундай кутилмаган муаммоларга олиб келиши мумкин. Шунинг учун ҳайдовчиларга асосий йўлдан оғмаслик ва хавфсизлик қоидаларига қатъий риоя қилиш тавсия этилмоқда.
Бу воқеа яна бир бор шундан далолат бермоқдаки, табиат билан боғлиқ ҳудудларда эҳтиёткорлик ва онгли қарор қабул қилиш ҳар бир ҳайдовчи учун жуда муҳимдир.
«Замин»ни Telegram’да ўқинг!
