Тошкент вилоятидаги мактабгача таълим муассасаларида болаларнинг оммавий заҳарланиши ҳолати жиддий ижтимоий ва ҳуқуқий муаммога айланди. Илгари Пискент ва Бўка туманларида содир бўлган воқеалардан сўнг Қуйи Чирчиқ тумани ҳам зарарланган ҳудудлар қаторига қўшилди. Болалар омбудсмани бу ҳақда расмий хабар берди.
Маълум қилишларича, 24 сентябрь куни Пискент, Бўка ва Қуйи Чирчиқ туманларидаги давлат боғчалари тарбияланувчилари турли тиббий симптомлар билан туман тиббиёт муассасаларига мурожаат қилган. Болаларнинг танаси ҳарорати кўтарилиши, кўнгил айниши ва ич кетиши каби белгилари кузатилган.
Дастлабки тиббий кўриклар натижасида болаларга зарур даволаш ишлари олиб борилган ва аксарият болалар соғлигини тиклаб, уйларига қайтарилган. Жиддий аҳволдаги беморлар топилмаган.
Шунингдек, Санитария-эпидемиологик осойишталик ва жамоат саломатлиги бошқармаси ҳамда Пискент, Бўка ва Оққўрғон туман бўлимлари мутахассислари боғчаларнинг ошхоналарида текширувлар ўтказиб, болалар истеъмол қилган таомлардан лаборатория намуналари олиб текширмоқда.
Болаларнинг оммавий заҳарланиши билан боғлиқ ҳар қандай ҳолат мутасадди идораларнинг доимий назоратида ва қўл остида ўрганилади.
25 сентябрь куни Тошкент вилояти ИИББ ҳузуридаги тергов бошқармаси Жиноят кодексининг 257-1-моддаси 1-қисми (санитария қоидаларини ёки эпидемияга қарши чораларни бузиш) асосида жиноят иши қўзғатди. Дастлабки тергов ҳаракатлари олиб борилмоқда, болалар омбудсмани эса бола манфаатларини ҳимоя қилиш нуқтаи назаридан вазиятни назорат қилиб, кузатувини давом эттирмоқда.
«Замин»ни Telegram’да ўқинг!
