Пахта йиғим-терими мавсумида мажбурий меҳнатга йўл қўйган мансабдорлар устидан қатъий чоралар қўлланди. Бу ҳақда Камбағалликни қисқартириш ва бандлик вазирлиги хабар берди.
Маълум қилишларича, пахта терими пайтида болалар меҳнати ва мажбурий меҳнатни олдини олиш, шунингдек, меҳнат қонунчилигини бузмаслик мақсадида мунтазам мониторинг ишлари олиб борилмоқда. Жорий йилнинг 10–20 сентябрь кунлари ўтказилган текширувларда 300дан ортиқ теримчи билан мавсумий меҳнат шартномалари тузишда амалий ёрдам кўрсатилган.
Шу даврда 11 ҳолатда меҳнат қонунчилиги бузилгани аниқланиб, мансабдор шахсларга Маъмурий жавобгарлик тўғрисидаги кодекснинг 49-моддасига асосан чора кўрилди. Шунингдек, мажбурий меҳнатга йўл қўйган 3 нафар мансабдорга 51-модда 1-қисми бўйича маъмурий чора қўлланди.
Вазирлик матбуот хизматининг таъкидлашича:
“Ўзбекистонда мажбурий меҳнатнинг ҳар қандай шакли қатъий тақиқланган ва қонун бузувчиларга нисбатан жавобгарлик белгиланиши таъминланади. Теримчиларнинг ҳуқуқларини ҳимоя қилиш ва меҳнат қонунчилигига риоя этилишини кузатиш – давлатнинг устувор вазифаларидан биридир”.
Мазкур чоралар пахта мавсумида ишчиларнинг ҳуқуқларини ҳимоя қилиш, ижтимоий адолат ва қонун устуворлигини таъминлашда муҳим аҳамиятга эга бўлди. Теримчилар ва қишлоқ хўжалиги соҳасидаги ходимлар учун бундай мониторинг тизими меҳнат амалиётида қонунийлик ва хавфсизликни таъминлайди.
«Замин»ни Telegram’да ўқинг!
