Сурхондарё вилояти маркази Термиз шаҳрида жамоатчилик орасида кескин муҳокамаларга сабаб бўлган ҳолат қайд этилди. Йўл ҳаракати хавфсизлиги давлат инспекцияси маълумотича, бир аёл ўзининг вояга етмаган ўғлини автомашина рулига ўтқазиб, йўлда ҳаракатланишига йўл қўйган.
Ҳодиса тасодифан эмас, балки шаҳардаги таълим муассасаси яқинида ўрнатилган видеокузатув камералари орқали қайд этилди. Кадрларда она боласига рульни ишониб топширгани ва йўлда ҳаракатлангани аниқ кўринади. Мутахассислар таъкидлашича, бу нафақат боланинг ҳаёти, балки йўлдаги барча иштирокчилар хавфсизлиги учун катта таҳдиддир.
Вилоят ЙҲХБ хабарида айтилишича, бу каби ҳолатлар таълим муассасалари атрофида ўрнатилган камералар орқали мунтазам кузатиб борилади. Агар ота-оналар фарзандининг салоҳиятини “кўз-кўз қилиш” мақсадида қонунга хилоф ҳаракат қилса, улар аниқланади ва белгиланган тартибда жавобгарликка тортилса, ажаб эмас.
«Қонун ўйинчоқ эмас. Автомашина бошқариш фақатгина белгиланган ҳуқуқ мавжуд бўлганда мумкин. Вояга етмаган фарзандни рульга ўтқазиш — бу хавфли ва масъулиятсиз ҳаракат», — дейилади ЙҲХБ баёнотида.
Мутасаддиларнинг таъкидлашича, бу каби “тажриба”лар болаларда нотўғри кўникмалар шакллантириши ва келгусида янада оғир оқибатларга олиб келиши мумкин. Шу боис барча ота-оналардан эҳтиётликка ва қонун қоидаларига риоя қилишга чақирилди.
“Zamin”ни Telegram'да ўқинг!
