Тошкент денгизи соҳили яна тозалик ва эзгулик масканига айланди. Кеча ўтказилган экологик тадбирда 300 килограммдан зиёд чиқинди йиғилди, деб хабар берди Чиқиндиларни бошқариш ва циркуляр иқтисодиётни ривожлантириш агентлиги.
Бу галги плоггинг акциясида 50 дан ортиқ “Осиё тараққиёт банки” ходимлари иштирок этиб, атроф-муҳитни асрашда фаол иштирок кўрсатишди. Улар соҳил бўйлаб юриб чиқинди йиғиш билан чекланиб қолмади — табиатга бўлган муносабат, масъулият ва маданият ҳақида ҳам фикр алмашишди.
Плоггинг — спорт ва экологияни бирлаштирган ҳаракат бўлиб, унда иштирокчилар югуриш ёки сайр қилиш жараёнида чиқинди йиғадилар. Бу сафар Тошкент денгизи соҳилида ўтган тадбир нафақат ҳудудни тозалаш, балки аҳолида экологик онгни оширишга ҳам хизмат қилди.
ОТБнинг Ўзбекистондаги доимий ваколатхонаси директори Канокпан Лао-Арая хоним тадбирда сўзга чиқиб, бу каби ташаббуслар мамлакатнинг “яшил келажак” ғояларига ҳамоҳанг эканини таъкидлади:
“Атроф-муҳитга ғамхўрлик қилиш — бу катта дастур ёки бир марталик акция эмас, балки кундалик масъулиятдир. Ўзбекистонда бундай ҳаракатлар тобора кучайиб бораётганини кўриб, жуда хурсандман. Бугунги плоггинг орқали биз ҳам соғлом ва тоза сайёра учун ўз ҳиссамизни қўшмоқдамиз”, — деди у.
Тадбир иштирокчилари ҳам бу ташаббуснинг аҳамиятини таъкидлаб, “ҳар бир йиғилган чиқинди — табиатни асраш йўлидаги бир қадам” эканини эслатиб ўтишди. Улар инсоннинг ҳар куни кичик бўлса-да, экологик ҳаракат орқали катта ўзгаришларга ҳисса қўша олишига ишонч билдирди.
Маълумот учун, Осиё тараққиёт банки (ОТБ) 69 та давлатни бирлаштирган халқаро молиявий ташкилот бўлиб, Ўзбекистон билан 1996 йилдан буён ҳамкорлик қилади. Ҳозирга қадар биргаликда 117 та лойиҳа амалга оширилган бўлиб, умумий инвестиция миқдори 14,6 миллиард АҚШ долларини ташкил этади. Банк қўллаб-қувватлаётган ҳар бир лойиҳада экологик барқарорлик, гендер тенглик ва “яшил иқтисодиёт” тамойилларига устувор аҳамият берилади.
Шунингдек, экоакция доирасида соҳадаги мутахассислар учун амалий семинарлар ва малака ошириш машғулотлари ҳам ўтказилди. Бу тадбир фақат соҳилни тозалаш билан чекланиб қолмай, жамоавий ҳамжиҳатлик, масъулият ва атроф-муҳитни муҳофаза қилиш маданиятини мустаҳкамлашга хизмат қилди.
Экологик акция иштирокчиларига кўра, бу каби тадбирлар нафақат Тошкент денгизи каби табиий масканларни асрашга, балки келгуси авлод учун соғлом муҳит яратишга қаратилган муҳим қадамдир. Шу боис бундай ҳаракатлар доимий тус олиши кутилмоқда.
Шундай қилиб, 300 килограмм чиқинди йиғилган бу хайрли тадбир — фақат тозалаш эмас, балки инсоннинг табиат олдидаги масъулиятини ёдга солган амалий дарс бўлди.
“Zamin”ни Telegram'да ўқинг!
