Самарқанд шаҳрида кеча, 9 октябрь куни кутилмаган йўл-транспорт ҳодисаси қайд этилди. Фожеага сабаб ЙПХ хизматига тегишли хизмат автомашинаси бўлди. Ҳодиса шаҳар марказидаги ҳаракат серқатнов йўлда содир бўлгани айтилмоқда. Бу ҳақда Самарқанд вилояти ИИБ ахборот хизмати маълум қилди.
Маълумотларга кўра, соат тахминан 14:15 ларда Самарқанд вилояти ИИБ Патруль-пост хизмати батальони инспектори бошқарувида бўлган “Нexia-3” русумли хизмат автомобили ҳаракат пайтида орқада кетаётган “Damas” русумли автомашинанинг орқа қисмига бориб урилган.
Тезлик ва масофага риоя қилинмагани натижасида биринчи “Damas” олдинда турган иккинчи “Damas” ва “Lacetti” автомашиналари билан тўқнашган. Натижада йўлда қисқа вақт ичида тўртта транспорт воситаси иштирокида занжирли авария юз берган.
Гувоҳларнинг сўзларига кўра, соат иккилар атрофида бўлган ҳодиса йўлдаги ҳаракатни маълум вақтга тўхтатиб қўйган. Патруль хизмати ходимлари ва шифокорлар қисқа вақт ичида воқеа жойига етиб келган.
Расмий маълумотда қайд этилишича, ЙПХ ходими бошқарувидаги “Nexia-3” ҳамда “Damas” ҳайдовчиси енгил жароҳат олган. Уларнинг иккаласи ҳам тиббий кўрикдан ўтказилиб, амбулатор ёрдам берилган ва шифокорлар томонидан уйларига жавоб қилинган.
Ҳодисада қатнашган барча ҳайдовчилар ҳушёр ҳолатда бўлгани тасдиқланган. Терговга қадар текширувда иштирок этган мутахассислар ҳозирда ҳар бир иштирокчининг ҳаракатини ҳуқуқий жиҳатдан баҳоламоқда.
Самарқанд шаҳар прокуратураси томонидан ҳолат бўйича терговга қадар текширув ҳаракатлари бошланган. ЙПХ ходимининг ҳаракатлари амалдаги йўл ҳаракати қоидаларига қай даражада зид бўлгани экспертиза хулосасидан сўнг аниқланади.
Айни пайтда ИИБ раҳбарияти хизмат интизоми ва йўлдаги хавфсизлик қоидалари бўйича ички текширувни ҳам бошлаган. Ҳодиса жамоатчилик орасида қизғин муҳокамага сабаб бўлди — кўпчилик ЙПХ ходимларининг ўзлари қоидаларга тўлиқ риоя қилиши кераклигини таъкидламоқда.
Экспертлар эса шундай ҳодисалар ҳайдовчилар учун муҳим сабоқ бўлиши лозимлигини айтишмоқда. Йўлда фақат фуқаролар эмас, балки ҳуқуқ-тартибот органлари ходимлари ҳам бир хил жавобгарликни ҳис этиши зарур, деб таъкидланмоқда.
“Zamin”ни Telegram'да ўқинг!
