Ўзбекистон божхона органлари ҳуқуқни муҳофаза қилувчи идоралар билан ҳамкорликда мамлакатда фаолият юритган энг йирик наркотармоқни фош этди. Расмий маълумотларга кўра, “Deadpool” номли Телеграм наркодўкон 2017 йилдан буён фаолият юритиб келган ва 4 мингдан ортиқ обуначига эга бўлган.
Жорий йилнинг август–сентябрь ойларида ўтказилган кўп босқичли тезкор операциялар чоғида мазкур тармоқнинг етакчи тарқатувчилари қўлга олинди.
31 август куни Андижон вилоятида қирғиз-ўзбек чегараси яқинида 602 грамм “alfa-PVP” синтетик моддасини қабул қилиб олаётган фуқаро ушланди. Тергов жараёнида у 2023 йилдан буён наркодўкон ишчиси эканини ва уч йил ичида 50 килограммга яқин модда тарқатганини маълум қилди.
10 сентябрь куни Тошкент вилоятида ўтказилган “назорат остида етказиб бериш” амалиётида яна икки фуқаро 492 грамм “клефедрон”ни қабул қилаётган пайтда қўлга олинди. Улар ярим йил давомида ҳар бири ойига ярим килограммга яқин синтетик модда тарқатиб келганини тан олди.
Тергов маълумотларига кўра, ушбу етакчи тарқатувчиларнинг ҳар бирига боғлиқ камида ўн нафар майда тарқатувчи — “закладчик” бўлган. Улар моддаларни асосан Тошкент ва Чирчиқ атрофидаги боғлар ҳамда таълим муассасалари яқинида яшириш орқали тарқатишган.
Ҳозирда божхона органлари томонидан жиноят иши қўзғатилган, тергов ва тезкор тадбирлар давом этмоқда.
“Zamin”ни Telegram'да ўқинг!
