Самарқанд вилоятининг Қўшработ туманидаги 71-мактабда рўй берган нохуш ҳолат жамоатчиликнинг эътиборини тортди. Маълум бўлишича, мактаб ходимаси бошланғич синф ўқувчисига қўл кўтаргани учун ишдан озод этилди, деб хабар берди vilmaktab.uz.
6 октябрь куни соат 09:30 ларда мактабнинг кадрлар бўйича менежери Қ.С. танаффус вақтида ўз фарзандининг шикоятини эшитган. Унга кўра, бола синфдоши билан тортишиб қолган ва жаҳли чиққан она ўша синфга кириб, болани уриб юборган.
Тез орада вазият ҳуқуқни муҳофаза қилувчи органлар томонидан назоратга олинган. Боланинг жароҳат олган-олмаганини аниқлаш учун экспертиза тайинланган. Текширув натижаларида болага енгил тан жароҳати етказилгани маълум бўлди.
Шундан сўнг, вилоят Мактабгача ва мактаб таълими бошқармаси ходимнинг меҳнат шартномаси бекор қилинганини маълум қилди. Шу билан бирга, мактабда ички интизом қоидаларига риояни таъминламаган маънавий-маърифий ишлар бўйича директор ўринбосарига ҳам интизомий жазо чораси кўрилди.
Бу ҳолат яна бир бор таълим муассасаларида мулоқот маданияти, сабр-тоқат ва болаларга нисбатан эҳтиёткорликнинг муҳимлигини эслатди. Болаларни тарбиялаш нафақат билим бериш, балки эҳтиром ва меҳр билан муносабатда бўлишни ҳам талаб қилади.
“Zamin”ни Telegram'да ўқинг!
