21 октябрь куни Тошкент шаҳрининг Сергели туманида жойлашган кўп қаватли уйда ёнғин содир бўлди. Бу ҳақда пойтахт Фавқулодда вазиятлар бошқармаси маълум қилди.
Маълумотларга кўра, соат 19:33 да Сергели 4-даҳадаги хонадонлардан бирида ёнғин ҳақида хабар келиб тушган. Қутқарув гуруҳлари беш дақиқа ичида воқеа жойига етиб борган ва соат 19:56 да ёнғин тўлиқ ўчирилган.
Дастлабки маълумотларга кўра, 15 квадрат метр майдондаги уй жиҳозлари ёнган. Олов қисқа фурсатда назоратга олинган ва бошқа хонадонларга тарқалмаган.
Фавқулодда вазиятлар бошқармаси маълум қилишича, ёнғин оқибатида ҳеч ким жароҳат олмаган. Ҳозирда ёнғин сабаблари ва келтирилган моддий зарар миқдори аниқланмоқда.
Мутахассислар аҳолини электр жиҳозларидан фойдаланишда эҳтиёткор бўлишга, хонадонларда ёнғинга қарши талабларга қатъий риоя этишга чақирмоқда.
