Тошкент шаҳрининг Янгиҳаёт туманида дам олишга келган эркак икки аёлга нисбатан шаҳвоний шилқимлик қилгани учун маъмурий жавобгарликка тортилди. Бу ҳақда суд ҳужжати орқали маълум бўлди.
Маълумотларга кўра, 14 октябрь куни “Янги турмуш” маҳалласида яшовчи З.Ф. ёмон туш кўргани учун уни “ўқиб бериши” мумкин бўлган таниш аёл орқали М.А. исмли эркакни уйига чақирган.
Аёлнинг таниши М.А. хизматини “тушни ўқиб бериш” деб таърифлаб, З.Ф. унга 3,6 миллион сўм тўлаши кераклигини айтган. Аммо хонадонга келган эркак илгари унинг жиянига, кейин эса ўзига нисбатан номаъқул ҳаракатлар қилиб, ўпмоқчи бўлган.
Қўрқиб кетган З.Ф. дарҳол ҳуқуқ-тартибот идораларига мурожаат қилган.
21 октябрь куни Янгиҳаёт туман судида иш кўриб чиқилди. Судда М.А. қилган ишини тан олган ва пушаймонлигини билдирган.
Суд уни Маъмурий жавобгарлик тўғрисидаги кодекснинг 41-1-моддаси (“Шаҳвоний шилқимлик қилиш”) бўйича айбдор деб топиб, 5 суткага маъмурий қамоқ жазоси тайинлади.
Мутахассислар фуқароларни бегона шахсларни уйга чақиришда эҳтиёткор бўлишга ва ҳар қандай ноодатий ҳолатда ҳуқуқ-тартибот идораларига зудлик билан мурожаат қилишга чақиради.
“Zamin”ни Telegram'да ўқинг!
