Китоб туманида яшовчи ҳайдовчи маст ҳолда рульга ўтириб, “Damas” русумли автомобилни уриб, йўл-транспорт ҳодисасига сабабчи бўлди, деб хабар берди Kun.uz.
Тергов маълумотларига кўра, У.Э. бошқарувидаги “Labo” автомашинаси йўл четида тўхтаб турган “Damas”га бориб урилган. Натижада жабрланувчига 3,4 миллион сўмлик моддий зарар етган.
Суд У.Э.ни Маъмурий жавобгарлик тўғрисидаги кодекснинг 131-моддаси 1-қисми билан айбдор деб топди ва унга уч йил ҳайдовчилик ҳуқуқидан маҳрум этиш ҳамда 16 миллион 480 минг сўм жарима жазосини тайинлади.
Мажбурий ижро бюроси маълум қилишича, ҳайдовчи тайинланган жаримани тўлиқ тўлаб бўлди.
Муттахассислар таъкидламоқда: рульга ўтирган одам нафақат ўз, балки бошқаларнинг ҳам ҳаёти учун жавобгар. Бир лаҳзали кайфият ва масъулиятсиз қарор бутун тақдирни ўзгартириб юбориши мумкин.
