Тошкент вилоятида чегарадан чиқиб кетаётган аёлнинг чақалоқ таглиги ичида қиймати 133 миллион сўмга тенг олтин қуймалар топилди, деб хабар берди Божхона қўмитаси.
Маълумотларга кўра, “Яллама” чегара постида фуқаронинг юклари текширилганда, икки дона, умумий оғирлиги 111 грамм бўлган олтин қуймалар аниқланган. Улар махсус равишда чақалоқ таглиги ичига яширилгани маълум бўлди.
Текширув натижасида олтин мусодара қилинди. Ҳозирда божхона органлари томонидан суриштирув ишлари олиб борилмоқда.
Расмийлар эслатганидек, амалдаги қонунчиликка кўра, фуқаролар 65 граммгача бўлган олтиндан ясалган тайёр заргарлик буюмларини декларациясиз олиб чиқишлари мумкин. Белгиланган миқдордан ортиқ маҳсулот эса мажбурий декларация асосида расмийлаштирилиши лозим.
Божхона ходимлари ушбу ҳолат орқали чегарадан ноқонуний йўл билан қимматбаҳо металлар олиб ўтиш уринишларига қарши кураш янада кучайтирилишини маълум қилмоқда.
