Тошкентнинг Бектемир туманида бир неча автомобилдан йирик миқдорда пул ўғирлаган шахс қўлга олинди. Ҳодиса ҳақида шаҳар Ички ишлар бош бошқармаси маълумот берди.
Дастлаб, гумонланувчи Қўйлиқ деҳқон бозори атрофидаги Nexia-2’ни қайчи ёрдамида очиб, салон ва юкхонани титкилаган. У ердан қарийб 76 миллион сўм топиб, ўғирланган пул билан изини йўқотгани айтилмоқда.
Гумонланувчининг айтишича, у атрофни кузатиб турган пайтда автомобил эгаси катта миқдордаги пулни тушириб олиб кетганини кўрган, машинада сигнализация йўқлигини билиб, вазиятдан фойдаланган.
Бир муддатдан кейин у яна ўша ҳудудга қайтиб, бу сафар эшиклари очиқ қолган Cobalt’дан 17 миллион сўмни ўғирлаб кетган. Автомобил эгаси телефонда гаплашиб, машинани қулфламай қолдиргани гумонланувчи учун яна имконият бўлган.
Шундан сўнг, у яна жиноят содир этиш нияти билан Бектемирга қайтганда, тезкор тадбир вақтида қўлга олинган.
Мазкур ҳолат юзасидан Жиноят кодексининг 169-моддаси — “Ўғрилик” билан иш қўзғатилган. Гумонланувчига нисбатан қамоққа олиш эҳтиёт чораси қўлланилган. Тергов жараёни давом этмоқда.
“Zamin”ни Telegram'да ўқинг!
