Наманган вилоятида болалар ҳаётини хавф остида қолдирган йўл-транспорт ҳолати жамоатчиликнинг кескин эътирозига сабаб бўлди. 15 декабрь куни ижтимоий тармоқларда тарқалган видеоларда Damas русумли автомашина пиёдалар ўтиш йўлагидан ўтаётган болаларга йўл бермагани акс этган.
Мазкур ҳолат юзасидан вилоят Йўл ҳаракати хавфсизлиги бошқармаси томонидан тезкор суриштирув ўтказилди. Натижада Damas автомашинаси жарима майдонига жойлаштирилиб, ҳайдовчига қонунчиликка мувофиқ маъмурий баённома тузилди.
Текширув давомида хавфли вазият юзага келишида Spark русумли автомашинанинг пиёдалар ўтиш жойи олдида қоидабузарлик билан тўхтаб қолдирилгани ҳам аниқланди. Бу ҳолат Damas ҳайдовчисининг йўлни тўлиқ кўришига жиддий тўсқинлик қилган.
Ҳар икки ҳайдовчи ҳам содир бўлган ҳолатдан афсусда эканини билдириб, бундан буён йўл ҳаракати қоидаларига қатъий амал қилишга ваъда берди.
Қонунга мувофиқ, Damas ҳайдовчисига Маъмурий жавобгарлик тўғрисидаги кодекснинг 128-моддаси, Spark ҳайдовчисига эса 128-6-моддаси асосида маъмурий жавобгарлик чоралари қўлланилди.
Йўлда бир лаҳзалик беэътиборлик оғир оқибатларга олиб келиши мумкин. Шу боис ҳайдовчилардан, айниқса пиёдалар ўтиш жойларида, максимал даражада ҳушёр бўлиш талаб этилади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
