Тошкент вилоятининг Зангиота туманида жойлашган мактаблардан бирида ўқувчиларга нисбатан қонунга зид ҳолат аниқланди. Болалар омбудсмани маълум қилишича, таълим муассасасида айрим ўқувчилар тарбиявий жазо баҳонасида мажбурий меҳнатга жалб қилинган.
Фуқаро мурожаати асосида ўтказилган ўрганишлар давомида ўқувчиларга дарахт оқлаш, ер суғориш ва қор кураш каби ишлар юклатилгани маълум бўлди. Бу ишлар мактаб маъмурияти ва айрим педагоглар томонидан “тарбия чораси” сифатида амалга оширилган.
Ҳолат Камбағалликни қисқартириш ва бандлик вазирлигининг Тошкент вилояти бошқармаси томонидан ўрганилиб, қонунбузарлик тасдиқланди. Натижада мактаб маъмуриятига нисбатан Маъмурий жавобгарлик тўғрисидаги кодекснинг 51-моддаси 1-қисми асосида маъмурий жарима қўлланди.
Расмий маълумотларда қайси мактаб экани ва неча нафар ўқувчи мажбурий меҳнатга жалб қилингани очиқланмаган. Масъуллар таълим муассасаларида болалар ҳуқуқлари қатъий ҳимоя қилиниши шарт эканини яна бир бор таъкидламоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
