Самарқанд вилоятининг Пайариқ туманида оғир ва жамоатчиликни ларзага солган ҳолат қайд этилди. Хабарларга кўра, бир аёл туғруқхона олдида чақалоқни дунёга келтириб, уни ҳожатхонадаги чиқинди қутисига ташлаб кетган.
Манбада айтилишича, воқеа Янги йил байрами арафасида содир бўлган. Келинчак Пайариқ тумани туғруқ бўлимига мурожаат қилиб, шифокорлардан ҳомиласини тушириш масаласида ёрдам сўраган. Бироқ у қониқарли жавоб ололмаган. Шундан сўнг, аёл чақалоқни туғруқхона ёнида туғиб, ҳожатхона чиқиндисига ташлаб кетгани маълум қилинмоқда.
Ҳолат кузатув камералари орқали аниқланиб, тегишли хизматлар томонидан текширув ишлари бошланган. Чақалоқ эса ўлик ҳолда топилган.
Самарқанд вилояти ИИБ ахборот хизмати маълумотига кўра, айни пайтда воқеа юзасидан экспертиза тайинланган. Унда бола тирик туғилганми ёки ҳомила аввалдан нобуд бўлган ҳолда туғилганми — шу масалага аниқлик киритилади. Экспертиза хулосасидан кейин жиноят иши масаласи бўйича қарор қабул қилиниши билдирилган.
Ҳуқуқ-тартибот идоралари қўшимча маълумот экспертиза натижалари эълон қилингач тақдим этилишини қайд этган.
Бу воқеа — жамият учун ҳам, ҳар бир оила учун ҳам қаттиқ ўйлантирадиган сигнал. Бундай вазиятда қолган аёлларни ўз вақтида тиббий ва психологик ёрдамга йўналтириш, масъул идоралар билан очиқ ишлаш эса кейинги фожиаларнинг олдини олишда ҳал қилувчи аҳамиятга эга.
