Сурхондарё вилоятида йўл-патрул хизмати ходимларини обрўсизлантирувчи видео тасвирга олиб, уни ижтимоий тармоқларда тарқатган фуқарога нисбатан қатъий чора кўрилди. Бу ҳақда Давлат йўл ҳаракати хавфсизлиги хизмати матбуот хизмати маълум қилди.
Маълумотларга кўра, Денов туманида яшовчи фуқаро 2026 йил 9 январь куни хизмат вазифасини бажараётган ЙПХ ходимларини видеога олган. Кейинчалик у мазкур лавҳаларга ҳақоратли овоз ва изоҳларни монтаж қилиб, шахсий Instagram саҳифасига жойлаштирган. Натижада ушбу видео инспекторларнинг шаъни ва обрўсига путур етказган.
Ходимларнинг айтишича, видео қисқа вақт ичида 2,5 миллион мартадан ортиқ томоша қилинган. Изоҳлар эса ҳақорат ва ҳаққоратларга тўлган бўлиб, бу ҳолат жамоатчилик орасида салбий кайфиятни кучайтирган. “Изоҳларда мен ҳақимда ҳам, ота-онам ҳақида ҳам оғир сўзлар қолдирилган. Қаттиқроқ чора кўрилса, бу бошқаларга ҳам сабоқ бўлади”, деган инспекторлардан бири.
Ҳуқуқбузар суд жараёнида айбини тўлиқ тан олган. У видеони фақат обуначилар сонини ошириш мақсадида жойлаштирганини, қилган ишидан пушаймон эканини билдирган.
Суд қарорига кўра, фуқарога нисбатан Маъмурий жавобгарлик тўғрисидаги кодекснинг ҳуқуқни муҳофаза қилувчи органлар ходимларини обрўсизлантиришга қаратилган фото ёки видео материалларни тарқатишни назарда тутувчи моддаси билан 7 сутка маъмурий қамоқ жазоси тайинланди.
Айтиш жоиз, бу каби ҳолатлар аввал ҳам кузатилган. Қашқадарё вилоятида ЙПХ инспекторини обрўсизлантириш мақсадида видеолар тарқатган шахс ҳам 7 суткага қамалган эди. Шунингдек, Тошкент шаҳрида ЙПХ ходимини автомобиль капоти устида судраб кетган йигитга нисбатан жиноят иши қўзғатилган.
Бундан ташқари, Сурхондарёда яна бир ҳолатда ЙПХ инспекторларини ҳақоратлаб, видеони ижтимоий тармоққа жойлаштирган ҳайдовчи аёлга 4 сутка маъмурий қамоқ жазоси берилган.
Мутахассислар фуқароларни ижтимоий тармоқларда масъулиятли бўлишга, хизмат вазифасини бажараётган ходимларни ҳақорат қилиш ёки обрўсизлантириш қонун олдида жавобгарликка олиб келишини унутмасликка чақирмоқда.
“Zamin”ни Telegram'да ўқинг!
