Андижон вилоятида тезлик назоратига мўлжалланган радар қурилмасига тажовуз қилингани ҳақида хабар тарқалди. Маълумотларга кўра, Марҳамат туманида 3 нафар вояга етмаган шахс йўл бўйида ўрнатилган автоматлаштирилган фото ва видео қайд этиш қурилмасини қасддан бузиб, кейин уни каналга оқизиб юборган.
Қайд этилишича, жорий йилнинг 9 январь куни Асака–Марҳамат автомобиль йўлида жойлаштирилган тезликни аниқловчи ускуна номаълум шахслар томонидан шикастлантирилиб, олиб кетилгани ҳақида ички ишлар бўлимига маълумот келиб тушган. Шундан сўнг тезкор-қидирув тадбирлари бошланган.
Олиб борилган суриштирувлар давомида ушбу ишни уч нафар ўсмир содир этгани аниқланган. Маълум бўлишича, улар радарни ёғоч ёрдамида уриб тушириб, кейин уни каналга ташлаб кетган.
Ҳолат юзасидан Жиноят кодексининг 169-моддаси 2-қисми “а” банди (ўғрилик) билан жиноят иши қўзғатилган. Ҳозирда тергов ҳаракатлари давом этмоқда.
“Zamin”ни Telegram'да ўқинг!
