Тошкентда вояга етмаганларга босқинчилик қилганлар қўлга олинди

Тошкент шаҳрида вояга етмаган ўсмирга нисбатан содир этилган босқинчилик жинояти жамоатчилик орасида катта резонанс уйғотди. Пойтахт ИИББ матбуот хизмати маълум қилишича, ушбу жиноятни содир этган икки нафар шахс қисқа муддат ичида қўлга олинган.

Маълумотларга кўра, ҳодиса “Қўйлиқ” кийим бозорининг орқа қисмида, дарё бўйи ҳудудида содир бўлган. Вояга етмаган Отабек исмли ўсмирга нисбатан куч ишлатиб, босқинчилик қилингани ҳақида ички ишлар органларига хабар тушган.

Тезкор-қидирув тадбирлари давомида гумонланувчилар аниқланиб, Бектемир туманида қўлга олинган. Улардан бири Тошкент вилоятида яшовчи Анвар исмли шахс, иккинчиси эса Андижон вилоятидан бўлиб, муқаддам судланган Баҳром экани маълум қилинди.

Гумонланувчилардан бирининг сўзларига кўра, ҳодиса куни улар бозор томон йўл олган бўлган. Шу пайтда тасодифан учраган ўсмир чалғитилган, ортидан эса унга зарба берилган. “Қилган ишимдан қаттиқ афсусдаман”, дея изоҳ берган у.

Айни пайтда мазкур шахсларга нисбатан Жиноят кодексининг тегишли моддалари билан жиноят иши қўзғатилиб, суд қарорига асосан қамоқ эҳтиёт чораси танланган.

Эслатиб ўтиш жоиз, сўнгги вақтларда мамлакатнинг турли ҳудудларида уюшган ва зўравонликка мойил гуруҳларга қарши кескин чоралар кўрилмоқда. Ҳуқуқни муҳофаза қилувчи органлар бундай жиноятларга нисбатан муросасиз муносабатда эканини таъкидламоқда.