7 қаватдан қулаётган болани тутган ўзбек қаҳрамони

Россияда 7-қаватдан тушиб кетиш арафасида қолган болани тутиб қолган Хайрулло Ибодуллаев ҳодиса қандай кечганини сўзлаб берди. Унинг айтишича, ўша куни ишга чиққанида юқори қаватлардан икки аёл пастга қараб қаттиқ бақираётганини эшитган.

Шундан кейин Хайрулло дераза олдида ўйнаб ўтирган болани пайқаб қолади. Вақтни бой бермасдан, болага овоз берган:

Киргин ичкарига тушиб кетасан деб бақирдим бола эса гапни олмади кирмади

Унинг сўзларига кўра, бироз иши билан машғул бўлса-да, хаёли ҳамон ўша болада бўлган. Ва хавотири бекор эмас экан.

Тўсатдан бола осилиб қолган. Бу манзарани кўрган Хайрулло дарҳол унинг тагига югуриб бориб, болани тутиб қолишга уринади. Бир зум ичида тақдир ҳал бўлади: бола қаттиқ зарба билан тушади.

Бола нафас ололмай қолди мен дарров ёрдам бердим массаж қилдим деб эслайди у

Сўнгги маълумотларга кўра, бола ҳозир реанимацияда, аҳволи барқарор. Бир неча жойи синган, жумладан оёғи ва ички аъзолари жароҳатланган. Қаҳрамонлик кўрсатган ўзбекистонлик эркакнинг ҳам қўл панжалари ва қовурғаси сингани айтилмоқда.

Хайрулло Ибодуллаевнинг бу жасорати эътиборсиз қолмади. У тўртинчи “Тигран Кеосаян” мукофоти билан тақдирланган. Шунингдек, рағбат сифатида унга бир миллион рубль миқдорида пул мукофоти ҳам берилмоқчи.

Бундан ташқари, Шавкат Мирзиёевнинг 23 февраль кунги фармони билан Хайрулло Ибодуллаев “Жасорат” медали билан ҳам мукофотланган.

Баъзан қаҳрамонлик кино кадри эмас оддий бир иш кунида ҳам туғилади. Энг муҳими бу жасорат ортида битта боланинг ҳаёти қолди ва бу ҳаммадан катта ғалаба.