Бухоро шаҳрида 15 апрель куни йўл ҳаракати билан боғлиқ жиддий ҳодиса содир бўлди. Chery автомобилини бошқариб келаётган ҳайдовчи маст ҳолатда бўлгани аниқланиб, йўл-транспорт ҳодисасига сабаб бўлди.
Маълумотларга кўра, 1981 йилда туғилган фуқаро Алпомиш кўчасида ҳаракатланиб кетаётган вақтда пиёдаларни ўтказиш учун тўхтаб турган Onix автомобилининг орқа қисмига урилиб кетган. Шундан сўнг у бошқарувни йўқотиб, қарама-қарши йўналишда пиёдаларга йўл бераётган Lacetti билан ҳам тўқнашган.
Афсуски, ҳодиса давомида пиёдалар йўлакчасидан ўтаётган 2021 йилда туғилган бола ҳам уриб юборилган. Шунингдек, ҳаракат давомида яна бир транспорт воситасига зарар етказилган ва ҳайдовчи воқеа жойидан қочиб кетган.
Тезкор суриштирувлар натижасида ҳайдовчининг спиртли ичимлик таъсирида бўлгани тасдиқланган. Унинг мастлик ҳолати белгиланган тартибда расмийлаштирилган.
Ҳолат юзасидан унга нисбатан Маъмурий жавобгарлик тўғрисидаги кодекснинг 131-моддасига асосан баённома тузилган. Ҳайдовчи 3 йилгача ҳайдовчилик ҳуқуқидан маҳрум қилиниши ва 40 баравар базавий ҳисоблаш миқдорида жаримага тортилиши мумкин.
Ҳозирда ҳолат бўйича терговга қадар текширув ишлари давом этмоқда.
