Қашқадарёда лолазорни пайҳон қилганлар жаримага тортилди
Қашқадарё вилоятининг Кўкдала туманида лолазорни автомобилда босиб ўтиб, табиатга зарар етказган бир гуруҳ фуқаролар жавобгарликка тортилди. Ҳуқуқбузарларнинг транспорт воситалари жарима майдончасига жойлаштирилиб, уларга жами 61 миллион 800 минг сўм миқдорида жарима белгиланди. Шунингдек, айбдорлар табиатга етказилган 6 млн 592 минг сўмлик зарарни тўлиқ қоплаши шарт қилиб белгиланди. Экология қўмитаси барчани табиат ва яшил ҳудудларни асраб-авайлашга чақирди.
Қашқадарё вилоятининг Кўкдала туманида табиатга нисбатан ноқонуний ҳаракат содир этилган ҳолат қайд этилди. Бир гуруҳ фуқаролар лолазор ҳудудини автомобилда босиб ўтгани аниқланди.
Мазкур воқеа Экология ва иқлим ўзгариши бошқармаси ҳамда Ички ишлар органлари томонидан ўрганиб чиқилди. Текширувлар давомида ҳуқуқбузарликка йўл қўйган шахслар белгиланган тартибда аниқланди ва уларнинг транспорт воситалари жарима майдончасига жойлаштирилди.
Расмий ҳисоб-китобларга кўра, табиатга етказилган зарар миқдори 6 миллион 592 минг сўмни ташкил этган. Шу билан бирга, уч нафар ҳуқуқбузарнинг ҳар бирига базавий ҳисоблаш миқдорининг 50 баравари, яъни 20 миллион 600 минг сўмдан жарима белгиланган. Жами жарима суммаси 61 миллион 800 минг сўмни ташкил қилади.
Қайд этилишича, ҳуқуқбузарлар етказилган зарарни ҳам, жаримани ҳам тўлиқ қоплаши шарт қилиб белгиланган.
Экология қўмитаси аҳолига табиатга эҳтиёткорона муносабатда бўлиш, ўсимликлар ва яшил ҳудудларни асраб-авайлаш муҳим эканини эслатди. Мутахассислар таъкидлашича, табиатга етказилган ҳар қандай зарар қонун доирасида жиддий жавобгарликка сабаб бўлади.
Изоҳлар 0
…