Самарқанд вилоятида уй сноси учун берилган компенсация пули устидаги келишмовчилик оғир жиноят билан якунланди.
Суд ҳужжатларига кўра, 36 ёшли эркак маст ҳолатда опасининг уйига келиб, у ерда спиртли ичимлик истеъмол қилган. Суҳбат давомида у уй учун ажратилган товон пулидан улуш талаб қилган.
41 ёшли опа эса бу талабни рад этиб, маблағнинг бир қисми аллақачон берилганини айтган.
Шундан сўнг улар ўртасида жанжал келиб чиққан. Эркак ошхонадаги пичоқ билан опасининг кўкрак қисмига зарба берган. Аёл воқеа жойида вафот этган.
Судда эркак ўз айбини тан олиб, енгиллик сўраган. У илгари ҳам жиноят содир этгани учун судланган шахс экани қайд этилган.
Суд ҳукмига кўра, у Жиноят кодексининг 97 моддаси 2 қисми билан айбдор деб топилиб, 16 йил муддатга озодликдан маҳрум этилди ва жазони умумий тартибли колонияда ўташи белгиланди.
“Zamin”ни Telegram'да ўқинг!
