Instagram’даги ахлоққа зид реклама тарқатган саҳифаларга иш қўзғатилди

Ўзбекистонда ижтимоий тармоқларда тарқалган айрим реклама постлари юзасидан Рақобат қўмитаси томонидан ўрганиш ва текшириш ишлари амалга оширилди.

Мутахассислар Instagram платформасида фаолият юритувчи “aykous_sekret”, “dom_penyuar”, “shiray shop”, “nargizem_shop” ҳамда “arzon hostel” номли саҳифаларда жойлаштирилган реклама видеоларини таҳлил қилишди.

Ўрганиш натижасида ушбу рекламалар мазмуни жамоатчиликда қабул қилинган одоб-ахлоқ ва маънавий қоидаларга мос келмаслиги маълум бўлган.

Текширувлар якунлангач, “aykous_sekret” ва “dom_penyuar” дўконлари раҳбарлари бўйича “Реклама тўғрисида”ги қонун талабларини бузиш ҳолатлари юзасидан расман иш қўзғатилган.

Шунингдек, “shiray shop”, “nargizem_shop” ва “arzon hostel” саҳифалари бўйича маъмурий ҳужжатлар тузилиб, иш материаллари суд органларига юборилган.

Амалдаги қонунларга мувофиқ, рекламада миллий қадриятлар ҳамда ахлоқий меъёрларга зид бўлган тасвир ва иборалардан фойдаланиш тақиқланади.