Самарқандда маст ҳайдовчи юқори тезликда ҳаракатланиб, тўхтаб турган автомобилни парчалаб юборди
Самарқанд вилоятининг Жомбой туманида маст ҳайдовчи юқори тезликда ҳаракатланиб, йўл четида тўхтаб турган автомобилга бориб урилди. Тўқнашув оқибатида ҳар икки машина ҳайдовчиси жароҳат олиб шифохонага ётқизилган, яқин атрофда бўлган болалар эса бахтли тасодиф туфайли омон қолган. Айбдор ҳайдовчи ўз кўрсатмасида маст ҳолда соатига 90 км тезликда келаётганини тан олган. Ҳозирда мазкур ҳолат юзасидан жиноий иш қўзғатилиб, тергов ҳаракатлари олиб борилмоқда.
Самарқанд вилоятида жиддий йўл-транспорт ҳодисаси содир бўлиб, икки автомобил иштирокидаги тўқнашув оқибатида фуқаролар жароҳат олди. Бу ҳақда вилоят Йўл ҳаракат хавфсизлиги бошқармаси маълум қилди.
Маълум қилинишича, воқеа Жомбой туманидаги ички йўллардан бирида юз берган. Видеотасвирларда кўринишича, Gentra русумли автомобил юқори тезликда ҳаракатланиб келиб, йўл четида тўхтаб турган бошқа бир Gentra’нинг орқа қисмига қаттиқ зарба билан урилган. Оқибатда тўхтаб турган машина ва унинг ёнида бўлган ҳайдовчи кучли зарба таъсирида бир неча метрга “учиб” кетган.
Эътиборли жиҳати, ҳодиса вақтида йўл четида икки нафар бола ўйнаб юрган бўлиб, улардан бири келаётган автомобиллардан сўнгги лаҳзада четлаб ўтишга улгурган.
ЙТҲ натижасида ҳар икки автомобил ҳайдовчилари турли даражада жароҳат олиб, шифохонага ётқизилган. Тезлик билан ҳаракатланган ҳайдовчи ўз кўрсатмасида тахминан 90 км/соат тезликда ва маст ҳолда бошқарувда бўлганини тан олган.
Ҳолат юзасидан жиноий иш қўзғатилган. Ҳуқуқбузар ҳайдовчига нисбатан қонуний чоралар кўрилиши, жумладан, ҳайдовчилик гувоҳномасидан маҳрум этилиши кутилмоқда.
Сўнгги вақтларда ҳудудларда бундай йўл ҳодисалари сони ошиб бораётгани хавотир уйғотмоқда. Мутахассислар ҳайдовчиларни йўл ҳаракати қоидаларига қатъий амал қилишга, айниқса тезлик ва маст ҳолда рульга ўтириш каби ҳолатлардан тийилишга чақирмоқда.
Изоҳлар 0
…