Самарқанд вилоятида оилавий зўравонлик билан боғлиқ навбатдаги оғир ҳолат суд ҳукми билан якунланди. Самарқанд вилоятининг Каттақўрғон шаҳрида аёлини мунтазам таҳқирлаб, уни оғир руҳий ҳолатга туширган эркак 9 йил 6 ойга озодликдан маҳрум этилди.
Суд ҳужжатларига кўра, 1995 йилда туғилган И.И. 2023 йил сентябрида Андижон шаҳрида яшовчи Г.К. билан шаръий никоҳ асосида турмуш қурган. Илк вақтларда оилада тинчлик сақланган, ҳатто жуфтликнинг бир нафар қиз фарзанди ҳам дунёга келган. Бироқ вақт ўтиши билан эркак аёлининг ўтмишини пеш қилиб, уни мунтазам равишда ҳақорат қила бошлаган. Бу эса оилада доимий жанжалларга сабаб бўлган.
2025 йил 1 июль куни аёл турмуш ўртоғи билан яшашни истамаслигини билдириб, фарзанди билан ота-онасиникига кетмоқчи бўлган. Бу қарор эса яна навбатдаги низони келтириб чиқарган. Жанжал пайтида аёл ўзини деразадан ташлашга уринган, шунингдек, ўз-ўзига жароҳат етказган.
Орадан бир кун ўтиб, 2 июль куни эр-хотин ўртасидаги зиддият яна авж олган. Эркак аёлининг кетишига қаршилик кўрсатиб, уни дўппослаган ва ҳаракатланишини чеклаган. Муттасил босим ва таҳқирларга чидамай қолган аёл ўз жонига қасд қилишини билдириб, пичоқ билан ўзини яралашга уринган.
Тергов маълумотларига кўра, жанжал вақтида пичоқ тортишув жараёнида аёлнинг бўйин қисмига санчилган. Оқибатда у оғир жароҳат олган.
Мазкур иш Жиноят ишлари бўйича суд томонидан кўриб чиқилиб, эркак Жиноят кодексининг 103-моддаси (ўзини ўзи ўлдириш даражасига етказиш) билан айбдор деб топилди ва унга 9 йил 6 ойлик қамоқ жазоси тайинланди.
Қайд этиш жоиз, бу каби ҳолатлар аввал ҳам кузатилган. Ўтган йили ҳам Самарқандга келин бўлиб тушган андижонлик аёлнинг фожиали ўлими жамоатчилик орасида кенг муҳокамаларга сабаб бўлган эди.
Мутахассислар оилавий зўравонлик ҳолатларига бефарқ бўлмаслик, бундай вазиятларда тегишли идораларга мурожаат қилиш муҳимлигини таъкидламоқда.
“Zamin”ни Telegram'да ўқинг!
