Фарғона вилоятида жамоатчиликни ларзага солган мудҳиш жиноят юзасидан суд ҳукми эълон қилинди. Ўзбекистон туманида эркак алимент тўламаслик мақсадида ўз турмуш ўртоғи ва кичик ёшли фарзандини ҳаётдан маҳрум этгани учун узоқ муддатга қамалди.
Маълум бўлишича, 2025 йил 3 ноябрь куни маст ҳолатда қайнотасининг уйига келган фуқаро аёли билан учрашган. Илгари аёл алимент ундириш бўйича судга мурожаат қилган ва суд қарорига кўра эркак 15 суткага қамалган эди.
Жазони ўтаб чиққанидан кейин ҳам оилавий низо барҳам топмаган, аксинча, янада кескинлашган. Тергов маълумотларига кўра, у алимент тўлашдан қутулиш ниятида олдиндан тайёрлаб келган ошхона пичоғи билан аёлига бир неча бор зарба берган. Фожиали ҳолат шундаки, у 3 ёшли қизчасини ҳам аямаган.
Олинган жароҳатлар оқибатида бола воқеа жойидаёқ вафот этган, онаси эса шифохонага олиб кетилаётган вақтда ҳаётдан кўз юмган. Жиноятни содир этган шахс воқеадан сўнг қочиб кетган, аммо кейинчалик қўлга олинган.
Жиноят ишлари бўйича суд уни Жиноят кодексининг тегишли моддалари билан айбдор деб топиб, 19 йил муддатга озодликдан маҳрум қилди.
Ушбу фожиа оилавий можароларни вақтида ҳал этмаслик қандай оғир оқибатларга олиб келиши мумкинлигини яна бир бор кўрсатди.
