Жиззах вилоятида селфи олиш истаги яна бир кўнгилсиз ҳолатга сабаб бўлди. Мактаб ўқувчиси поезд вагони устига чиқиб, суратга тушмоқчи бўлган пайтда кучли электр токи зарбасига учради.
Маълум бўлишича, воқеа 24 апрель куни Ғаллаорол туманидаги Маржонбулоқ темир йўл бекатида содир бўлган. Бекатда турган юк вагони устига чиққан 7-синф ўқувчиси айнан шу вақтда юқори кучланишли электр токи таъсирига тушган.
Расмий маълумотларга кўра, жабрланувчи 2012 йилда туғилган вояга етмаган бола бўлиб, у зудлик билан туман тиббиёт муассасасига олиб борилган. Ҳозирда у жонлантириш бўлимида даволанмоқда.
Шифокорлар хулосасига кўра, болада тана юзасининг 35–40 фоизини қамраб олган иккинчи ва учинчи даражали оғир куйиш жароҳатлари аниқланган.
Ҳодиса юзасидан вилоят транспортда хавфсизликни таъминлаш бошқармаси томонидан текширув ишлари олиб борилмоқда.
Афсуски, сўнгги вақтларда бундай ҳолатлар кўпайиб бормоқда. Аввалроқ Чирчиқ шаҳрида 17 ёшли йигит ҳам вагон устида ток уриши оқибатида оғир аҳволга тушгани хабар қилинган эди. Шунингдек, 27 апрель куни яна икки нафар вояга етмаган ўқувчи ҳам шундай хавфли ҳолатга дуч келган.
Мутахассислар темир йўл ҳудудларида, айниқса, юқори кучланишли тармоқлар яқинида эҳтиёткор бўлиш, бундай хавфли ҳаракатлардан тийилиш зарурлигини таъкидламоқда.
“Zamin”ни Telegram'да ўқинг!
