Фото: Yandex
Суриянинг шимоли-ғарбида хавфсизлик кучлари томонидан ўтказилган махсус амалиёт давомида бир гуруҳ ўзбек жангчилари қўлга олингани маълум қилинди. Бу ҳақда Reuters ахборот агентлиги хабар берди.
Дастлабки маълумотларга кўра, Идлиб ҳудудида қуролли шахсни қўлга олишга уриниш ортидан вазият кескинлашган. Шундан сўнг айрим ўзбек жангчилари унинг озод этилишини талаб қилиб, норозилик намойишлари уюштирган. Бу ҳолат тез орада хавфсизлик идоралари биноси олдида тўқнашувларга сабаб бўлган.
Идлиб вилоятининг бир қатор ҳудудларида, жумладан Кафрия ва ал-Фуа аҳоли пунктларида рейдлар ўтказилиб, намойишда қатнашган шахслар нишонга олинган. Айрим жойларда отишмалар кузатилгани, ҳудудга қўшимча куч ва техника жалб этилгани айтилмоқда.
Ҳозирча қўлга олинган ўзбеклар сони аниқ эмас. Турли манбаларга кўра, 2025 йил ҳолатида Сурияда 1500 нафарга яқин ўзбек жангчилари бўлган ва уларнинг айримлари оилалари билан яшаб келган.
Мутахассислар ушбу ҳодисани сўнгги ойлар ичида ҳукумат кучлари ва хорижий жангчилар ўртасидаги навбатдаги кескин тўқнашув сифатида баҳоламоқда. Аввалроқ ҳам Туркия чегараси яқинида шунга ўхшаш можаро юзага келган эди.
Айни пайтда Сурия ҳукумати хорижий жангчилар мақомини тартибга солиш ва уларни расмий тузилмаларга жалб этиш чораларини кўрмоқда.
“Zamin”ни Telegram'да ўқинг!
