Бухоро вилоятининг Вобкент туманида ЙПХ ходими иштирокида йўл-транспорт ҳодисаси содир бўлди. Ижтимоий тармоқларда тарқалган видеолардан сўнг ҳолат юзасидан вилоят Йўл ҳаракати хавфсизлиги бошқармаси расмий маълумот берди.
Маълум қилинишича, воқеа 27 апрель куни соат 09:05 атрофида Вобкент туманидаги Имом Бухорий кўчасида рўй берган. ЙҲХБ ходими Ё.Мавлонов ўзининг Cobalt русумли автомобилини бошқараётиб, пиёдалар йўлагидан ўтаётган 2009 йилда туғилган қиз — С.Н.ни уриб юборган.
Ҳодиса оқибатида қиз енгил тан жароҳатлари олган. Маълумотларга кўра, ҳайдовчи жабрланувчига дастлабки тиббий ёрдам кўрсатиш мақсадида уни шифохонага олиб борган.
Шунингдек, ходим хизмат вазифасини бажараётган вақтда ҳушёр ҳолатда бўлгани ва автомобилни бошқариш учун барча зарур ҳужжатларга эга экани айтилмоқда.
Айни пайтда мазкур ҳолат бўйича Вобкент тумани прокуратураси томонидан терговга қадар текширув ишлари олиб борилмоқда.
