Президент Шавкат Мирзиёев 8 май куни пойтахтимиздаги Ғалаба боғига ташриф буюриб, 9 май — Хотира ва қадрлаш куни муносабати билан ташкил этилган хотира маросимида иштирок этди. Бу сана халқимиз учун оддий тақвимдаги кун эмас, балки тарих, сабоқ, миннатдорлик ва тинчлик қадрини янада чуқур англаш кунидир.
Иккинчи жаҳон уруши якунланганига қарийб 81 йил бўлди. Аммо орадан шунча вақт ўтган бўлса-да, урушнинг аччиқ хотираси, инсоният бошига солган оғир кулфати, миллионлаб тақдирларни издан чиқарган фожиаси ҳали ҳам қалблардан ўчгани йўқ. Аксинча, бу мудҳиш тарих ҳар бир авлодга бир ҳақиқатни эслатади: тинчлик — инсон ҳаётидаги энг бебаҳо неъмат.
Шу маънода, 9 май — Хотира ва қадрлаш куни замирида чуқур маъно мужассам. Бу кунда халқимиз уруш майдонларида жон олиб, жон берган аждодларини, фронт ортида меҳнат қилган матонатли инсонларни, эл-юрт тинчлиги учун фидойилик кўрсатган барча қаҳрамонларни ёдга олади.
Анъанага мувофиқ, давлатимиз раҳбари Ғалаба боғидаги «Матонат мадҳияси» ёдгорлиги пойига гулчамбар қўйди. Ушбу муҳташам обида халқимиз уруш йилларида бошидан кечирган оғир синовлар, йўқотишлар, сабр, жасорат ва матонатнинг тимсоли сифатида қадрланади.
Президент Шавкат Мирзиёев бугун орамизда соғ-саломат яшаб келаётган уруш ва меҳнат фахрийлари, барча нуронийларга алоҳида меҳр ва эҳтиром билдириш халқимиз учун муқаддас бурч эканини таъкидлади. Давлат раҳбари Ғалаба боғи буюк ғалабага муносиб ҳисса қўшган кўп миллатли халқимизнинг қаҳрамонлиги ва жасоратини тараннум этадиган табаррук маскан эканини қайд этди.
– "Бугун орамизда соғ-саломат яшаб келаётган уруш ва меҳнат фахрийлари, барча нуронийларимизга алоҳида меҳримиз, эҳтиромимизни изҳор этамиз. Ушбу мажмуа буюк ғалабага муносиб ҳисса қўшган кўп миллатли халқимизнинг жасорати ва қаҳрамонлигини тараннум этадиган табаррук маскан, десак, тўғри бўлади", – деди давлатимиз раҳбари.
Тарихий маълумотларга кўра, фашизмга қарши қонли жангларда ўша даврда 6 миллион 800 минг нафарни ташкил этган Ўзбекистон аҳолисининг қарийб 2 миллион нафари иштирок этган. Бу рақамнинг ўзиёқ халқимиз уруш йилларида қандай улкан қурбонлик ва масъулиятни елкасига олганини кўрсатади.
Урушда юртдошларимизнинг 540 мингга яқини ҳалок бўлган, 158 минг нафари бедарак йўқолган. 50 мингдан ортиқ ватандошимиз концлагерларда мислсиз азоб-уқубатлар туфайли ҳаётдан кўз юмган, 60 мингдан зиёди эса ногирон бўлиб Ватанга қайтган. Бу рақамлар шунчаки статистика эмас — ҳар бирининг ортида бир оила, бир тақдир, бир армону дард бор.
Ўзбекистонлик аскар ва офицерлардан 214 мингга яқини жанговар орден ва медаллар билан тақдирлангани уларнинг фронтда кўрсатган мардлиги, жасорати ва фидойилигидан далолат беради. Улар нафақат ўз Ватани, балки инсоният келажаги учун курашган авлод вакиллари эди.
Уруш йилларида Ўзбекистон фронтнинг мустаҳкам таъминот базасига айланди. Юртимиздан жанг майдонларига катта миқдорда ҳарбий техника, қурол-яроғ, кийим-кечак ва озиқ-овқат етказиб берилди. Оғир шароитга қарамай, халқимиз меҳнат фронтида ҳам беқиёс матонат кўрсатди.
Энг таъсирли жиҳатлардан бири шуки, ўша йилларда Ўзбекистон уруш ҳудудларидан эвакуация қилинган қарийб 1 миллион 500 минг инсонни бағрига олди. Улар орасида ота-онасидан жудо бўлган 250 минг нафар етим бола ҳам бор эди. Халқимиз уларга бошпана, меҳр, нон ва умид берди. Бу — ўзбек халқи бағрикенглиги ва инсонпарварлигининг тарихдаги энг ёрқин саҳифаларидан бири.
Хотира маросимида Ўзбекистон Қуролли Кучлари вакиллари, давлат ва жамоат ташкилотлари ходимлари, маҳалла фаоллари ҳамда нуронийлар иштирок этиб, ёдгорлик пойига гуллар қўйди. Бу манзара авлодлар ўртасидаги маънавий боғлиқлик, хотирага садоқат ва тинчликка бўлган эҳтиромнинг ёрқин ифодаси бўлди.
Президент Шавкат Мирзиёев Ғалаба боғидаги «Миллат фидойилари» хиёбонида ҳам бўлиб, мустақиллик йилларида мамлакатимиз ҳимояси йўлида ҳалок бўлган ҳарбий хизматчилар ва ҳуқуқ-тартибот идоралари ходимлари хотирасига ҳурмат бажо келтирди.
Давлат раҳбари бир йил аввал ушбу ҳудудда «Миллат фидойилари» мажмуаси барпо этилгани бежиз эмаслигини таъкидлади. Бу маскан Ватан ҳимояси ҳар бир авлод учун муқаддас бурч эканини, ватанпарварлик анъаналари узлуксиз давом этишини эслатиб туради.
– "Бир йил олдин мана шу ҳудудда «Миллат фидойилари» мажмуасини барпо этганимиз, албатта, бежиз эмас. У Ватан ҳимояси ҳар бир авлоднинг муқаддас иши экани, ватанпарварлик анъаналари давомийлигини эслатиб туради", – деди Президентимиз.
Мажмуада мустақиллик йилларида Ватан озодлиги, халқимиз тинчлиги ва юрт хавфсизлиги йўлида қаҳрамонларча ҳалок бўлган 196 нафар ҳарбий хизматчи ҳамда ҳуқуқ-тартибот органлари ходимларининг номлари муҳрланган. Бу номлар шунчаки тошга битилган ёзувлар эмас, балки миллат хотирасига ўйилган жасорат тимсолларидир.
Президент Шавкат Мирзиёев ана шундай довюрак, мард ва фидойи фарзандларни тарбиялаган ота-оналарга чуқур миннатдорлик билдирди. Чунки Ватан учун жонини фидо қилган ҳар бир ўғлон ортида уни шу руҳда тарбиялаган оила, сабрли она, дуогўй ота ва бутун бир элнинг ишончи туради.
Халқимиз навқирон ёшда душманга қарши қалқон бўлган бундай қаҳрамон фарзандларини ҳеч қачон унутмайди. Маълум қилинишича, 2025 йилнинг ўзида ушбу мажмуани 650 мингга яқин юртдошимиз ва хорижий меҳмонлар зиёрат қилган. Бу рақам ҳам жамиятимизда хотира, қадр ва ватанпарварлик туйғулари қанчалик чуқур эканини кўрсатади.
Бу ерда кўплаб маънавий-маърифий тадбирлар, тарих ва ватанпарварлик дарслари, «Келажак соати» машғулотлари ўтказилмоқда. Бундай тадбирлар ёш авлоднинг қалбида Ватанга муҳаббат, тинчликка масъулият ва тарихга ҳурмат туйғуларини кучайтиришда муҳим аҳамиятга эга.
Жорий йил буюк аждодимиз Амир Темур таваллудининг 690 йиллиги юртимизда ва хорижда кенг нишонланмоқда. Соҳибқирон бобомизнинг давлатчилик, жасорат, адолат ва қаҳрамонлик машъаласи бугун ҳам ўз нурини сочиб турибди. Бу улуғ анъанани бугунги жасур аскарларимиз, офицерларимиз ва генералларимиз муносиб давом эттирмоқда.
Давлат раҳбари «Темурбеклар мактаблари» ўқувчилари, мард ҳарбийларимиз тимсолида Алпомиш, Жалолиддин Мангуберди ва Амир Темурларнинг янги авлодини кўраётганини таъкидлади. Бу сўзлар ёшлар учун катта ишонч, катта масъулият ва катта руҳий қувватдир.
Президент таъкидлаганидек, буюк аждодларимизнинг бой мероси, илм ва тажриба мактаби фақат музейларда эмас, балки халқимиз қалбида ҳам қайта жонланмоқда. Тошкентдаги Ислом цивилизацияси маркази, Темурийлар тарихи давлат музейи, Самарқанддаги Имом Бухорий мажмуаси каби масканлар ана шу маънавий уйғонишнинг ёрқин намунасидир.
Қайд этилганидек, Ватанни ҳимоя қилиш давлат ва халқ учун ҳеч қачон кун тартибидан тушмайдиган масала. Бу барчамиз учун муқаддас ва буюк бурчдир. Айниқса, бугунги таҳликали, мураккаб ва беқарор дунёда бу масаланинг аҳамияти янада ортиб бормоқда.
Жорий йил Ватанимиз мустақиллигининг 35 йиллиги кенг нишонланади. Ушбу улуғ сана «Ягона Ватан, ягона халқ бўлиб, янги ҳаёт ва келажак яратамиз» деган эзгу шиор асосида кутиб олинаётгани ҳам чуқур маънога эга.
Давлат раҳбари яқин-атрофдаги минтақаларда кечаётган қарама-қаршиликлар, уруш-жанжаллар ва хавфли жараёнлар шароитида миллий бирлик ва ҳамжиҳатлик энг катта куч, энг катта бойлик эканини алоҳида таъкидлади. Ҳаётнинг ўзи яна бир бор исботламоқда: тинчлик бор жойда тараққиёт бор, бирлик бор жойда келажак бор.
Президент Шавкат Мирзиёев Ватанни ҳимоя қилиш дунёдаги энг улуғ ва шарафли иш эканини қайд этди. Ҳарбий қасамёдига содиқ, эл-юрт тинчлиги йўлида мардона хизмат қилаётган ботир ўғлонларимиз ҳар қанча эътироф ва эҳтиромга муносиб.
– Бугун яқин-атрофимиздаги минтақаларда бўлаётган қарама-қаршилик ва уруш-жанжалларни кўриб турибмиз. Мана шундай мураккаб вазиятда миллий бирлик ва ҳамжиҳатликни сақлаш – энг катта куч, энг катта бойлик эканини ҳаётнинг ўзи яна бир бор тасдиқламоқда. Ватанни ҳимоя қилиш – дунёдаги энг улуғ ва шарафли ишдир. Бу ҳақиқатни чуқур англаб, ҳарбий қасамёдига доимо содиқ бўлиб келаётган ботир ва довюрак ўғлонларимизга ҳар қанча тасаннолар айтсак арзийди, – деди давлатимиз раҳбари.
«Миллат фидойилари» хиёбони кечаю кундуз жасорат овози янграб турадиган, тинчлик учун курашга чорлайдиган қутлуғ маскан бўлиб қолиши таъкидланди. Бу маскан келгусида минглаб, миллионлаб Ватан посбонларини тарбиялашга хизмат қилиши керак.
Шунингдек, Ватан олдидаги бурчини адо этиш чоғида қаҳрамонларча ҳалок бўлган ўғлонларимизнинг оила аъзолари ва фарзандларини қўллаб-қувватлаш, уларга ҳар томонлама ғамхўрлик кўрсатиш бундан буён ҳам изчил давом эттирилиши билдирилди.
Бу ташриф, бу маросим ва айтилган сўзлар яна бир ҳақиқатни эслатди: хотира бор жойда қадр бор, қадр бор жойда миллат руҳи тирик бўлади. Тинчликни асраш эса фақат ҳарбийларнинг эмас, балки ҳар бир фуқаронинг қалбидаги муқаддас бурчдир.
“Zamin”ни Telegram'да ўқинг!
