Андижон вилоятида ўтказилган навбатдаги рейд давомида болалар хавфсизлиги билан боғлиқ жиддий қоидабузарлик аниқланди. ЙПХ ходимлари томонидан тўхтатилган микроавтобусда 58 нафар бола ташилаётгани маълум бўлган.
Вилоят ЙҲХХ маълумотига кўра, ҳолат 6 май куни Избоскан туманидаги Ўрта қишлоқ маҳалласи ҳудудида қайд этилган. Мумтоз кўчасида ҳаракатланган King Long русумли микроавтобус инспекторлар томонидан текширув учун тўхтатилган.
Текширув жараёнида ҳайдовчи Қ.З. давлат-хусусий шериклик асосида фаолият юритувчи таълим муассасасининг 58 нафар тарбияланувчисини олиб кетаётгани аниқланган.
Мутасаддиларнинг билдиришича, мазкур ҳолат йўл ҳаракати қоидаларининг “одам ташиш” билан боғлиқ талабларига зид ҳисобланади. Шу сабабли ҳайдовчига нисбатан Маъмурий жавобгарлик тўғрисидаги кодекснинг тегишли моддаси асосида баённома расмийлаштирилган.
Шунингдек, ҳайдовчи ва таълим муассасаси масъуллари билан болаларни хавфсиз ташиш бўйича профилактик суҳбат ўтказилгани маълум қилинди.
Эслатиб ўтиш жоиз, шу каби ҳолатлар аввал ҳам кузатилган. Хусусан, Самарқанд вилоятида ўтказилган рейдларда Damas автомобилида 28 нафар бола ташилаётгани аниқланган эди. Яна бир ҳолатда эса енгил автомобилга 24 нафар боғча тарбияланувчиси жойлаштирилгани маълум бўлган.
“Zamin”ни Telegram'да ўқинг!
