Тошкент шаҳрида кичик ёшли бола иштирокидаги қизиқарли, аммо хавфли ҳолат ижтимоий тармоқларда муҳокамаларга сабаб бўлмоқда. Вояга етмаган бола ўйинчоқ автомобилда катта йўлга чиқиб, ҳақиқий автомашиналар орасида ҳаракатланган.
Пойтахт Йўл ҳаракати хавфсизлиги бошқармаси маълумотига кўра, воқеа 8 май куни соат 12:30 атрофида Бектемир туманидаги Олтинтопган кўчасида содир бўлган. Ота-она назоратидан четда қолган бола электрда ҳаракатланувчи ўйинчоқ машинасида йўлнинг қатнов қисмига чиқиб кетган.
Ҳолат атрофдагилар ва бошқа ҳайдовчилар учун хавфли вазиятни юзага келтирган. ЙҲХБ ходимлари томонидан боланинг хавфсизлиги таъминланиб, унинг ота-онасига тегишли тушунтириш берилган.
Шунингдек, боланинг отасига нисбатан Маъмурий жавобгарлик тўғрисидаги кодекснинг 47-моддаси — болаларни тарбиялаш ва назорат қилиш бўйича мажбуриятларни бажармаслик ҳолати юзасидан маъмурий баённома расмийлаштирилган.
Мазкур воқеа ижтимоий тармоқларда турли муҳокамаларга сабаб бўлиб, кўпчилик ота-оналарни фарзандлар хавфсизлигига жиддий эътибор қаратишга чақирмоқда.
