Фото: Вилоят Йўл ҳаракати хавфсизлиги бошқармаси
9 май куни Қашқадарё вилоятининг Яккабоғ туманида эътиборли ҳолат юз берди. “Ўзбек Тайсон” номи билан танилган ММА жангчиси Жасурбек Жўраев йўл-патрул хизмати ходимининг тўхташ ишорасига бўйсунмай ҳаракатлангани сабабли муаммога дуч келди.
Вилоят Йўл ҳаракати хавфсизлиги бошқармаси маълумотига кўра, спортчи бошқарувида бўлган Kia Sonet қисқа вақт ичида аниқланиб, тегишли чоралар асосида тўхтатилган. Шундан сўнг ҳайдовчидан нега ЙПХ ходими талабига амал қилмагани сўралган.
Маълум бўлишича, Жасурбек Жўраев ҳали ҳайдовчилик гувоҳномасига эга эмаслигини тан олган. Шу сабабли унга нисбатан маъмурий баённома расмийлаштирилиб, автомобил жарима майдончасига жойлаштирилган.
Жангчи ушбу ҳолат юзасидан ўз фикрини билдириб, яқин орада ҳайдовчилик гувоҳномасини олишни режалаштираётганини айтди. Унинг таъкидлашича, сўнгги пайтларда машғулотлар ва спорт фаолияти сабаб бу масалага вақт ажрата олмаган.
“Яқинда 'права' оламан. Ҳозир машғулотлар билан бандман, улгурмаяпман. Қонун ҳамма учун бир хил. Қилган ишимдан пушаймонман, буни ҳеч кимга тавсия қилмайман”, — дея изоҳ берган у.
Мазкур ҳолат яна бир бор йўл ҳаракати қоидаларига риоя қилиш, айниқса ҳужжатларсиз транспорт воситасини бошқармаслик қанчалик муҳим эканини эслатади. Қонун олдида ҳамма тенг экани эса бундай вазиятларда яққол намоён бўлмоқда.
“Zamin”ни Telegram'да ўқинг!
