Андижонда алимент тўламай юрган 2 мингга яқин шахсга нисбатан чора кўрилди

Андижон вилоятида оилаларда соғлом муҳитни қарор топтириш, оилавий ажралишлар, эрта турмуш ва яқин қариндошлар ўртасидаги никоҳларнинг олдини олиш, оилавий низоларни бартараф этиш борасида тизимли ишлар йўлга қўйилган. Бу ҳақда «ЎзА»га таяниб «Дарё» хабар берди.

Вилоятда оилалардаги ижтимоий-маънавий муҳитни ўрганиш мақсадида ташкил этилган махсус ишчи гуруҳлар жорий йилнинг ўтган даврида ҳар бир хонадонда бўлиб, оилаларнинг аҳволи, фуқароларни қийнаётган муаммоларни чуқур ўрганди.

Ўрганишлар давомида уч мингдан ортиқ низоли оила борлиги аниқланди. Кўрилган чора-тадбирлар натижасида икки мингдан зиёд оила ажралиб кетишининг олди олинди. Алимент тўламай юрган икки мингга яқин шахсга тегишли чоралар кўрилди.

Вилоятда йилига ўртача 25 мингдан ортиқ янги оила барпо бўлади. Бироқ, жорий йилнинг ўтган даврида 1 минг 700 га яқин оила қонуний ажралиб кетган. Ана шу ажримлар таҳлил этилганда, бунга кўпроқ фарзандсизлик, қайнона-келин можароси, қудалар ўртасидаги келишмовчиликлар, эркакнинг қонуний никоҳи бекор бўлмасдан бошқа оила қуриб олиши сингари қатор омиллар сабаб бўлаётгани аниқланган.